»  شۆک
 خواست لەسەر پەیمانگەی هونەرە جوانەكان لەناو گەنجانی كەركوك كەمدەكات
ئا / هاوار ستار


خوێندكارانی دەرچوی پۆلی سێیی ناوەندی، بەراورد بە ساڵانی رابردوو كەمتر روو لە پەیمانگەی هونەر جوانەكان دەكەن، راگڕ و مامۆستانیانی پەیمانگەش هۆكاری جیاواز بۆ كەمبونەوەی ناو تۆماركردنی خوێندكارن دەخەنەروو. 
یەكێك لە مامۆستایانی پەیمانگەی هونەرە جوانەكان ئاماژە بۆ ئەوە دەكات بەراورد بەدوو ساڵی رابردوو لە بەشی شانۆ 80% خوێندكار كەمی كردوە.
شكۆ عومەر مامۆستای بەشی شانۆ لە پەیمانگەی هونەرەجوانەكانی كەركوكی سەر بەحكومەتی هەرێم بۆ (هەواڵ) وتی: “چەند ساڵێكە لە پەیمانگە بەردەوامین و بەشەكانمان كراوەن بەڵام ئەم ساڵ لە چاو ساڵانی تر رێژەیەكی كەمتر فێرخواز و بەهرەمەندمان هەیە بە حوكمی كۆمەڵێك هۆكار”.
دەربارەی یەكێك لە هۆكارەكان ئەو مامۆستایە وتی: “دووركەتنەوەی بینای پەیمانگەكە بۆ شوێنێكی دوورتر و ناوچەیەكی میللی، ئەتوانین بڵێین گەڕەكێ نوێ و زیادەڕەویی لە دەرەوی ئاوەدانییە ئەمەش دەكرێ هۆكارێك بێت لەوەی گەنج كەمتر پەیوەندی بكات بە پەیمانگەوە بەگشتی”.
شكۆ عومەر وتیشی: “راستە بەردەوامین و هۆڵمان هەیە بۆ چالاكی و شوێنمان هەیە بۆ كارەكانمان، هەروەها خۆمان رێكمان خستووە، بەڵام بە نزیكی 80% خوێندكارمان كەمی كردوە، چونكە لە بەشی شانۆ ساڵێك پێش ئەوەی بێنە بینای نوێ 100 بۆ 120 فۆرم بۆ وەرگرتنی خوێندكار پڕكرایەوە كەچی ئەمساڵ 10 فۆرممان پێشكەش كردوە، هەر ئەو ساڵە بەشی تەشكیلی 200 فۆرمی هەبوو ئەم ساڵ 30 فۆرمی دابەشكردوە و ناوەكان هاتوەتەوە”.
ئەو مامۆستایە پێی وابوو خراپی دۆخی كورد بەگشتی لە شارەكە و پاشەكشەی خوێندنی كوردیش كاریگەری لەسەر كەمی فێرخواز هەیە و ئەوەشی خستەڕوو: “خەڵكی بەگشتی كشاوەتە و پەیمانگەی هونەرە جوانەكانیش هەر لەو چوارچێوەیە بەر ئەو دووركەوتنەوەیە كەوتوە، دۆخەكە بەگشتی گەنجی لە ئارەزووكردن بۆ هونەر كزكردوە”.
هەر بەوتەی ئەو مامۆستایەی پەیمانگەی هونەرە جوانەكانی كەركوك: “لەڕوی یاساییەوە لە وەزارەت و بەرێوبەرایەتی گشتیەوە هەر مەرحەلەیەكی پەیمانگە تەنها پێنج خوێندكاریشی بەسەرەوە هەبێت دەتوانێت بەش بكاتەوە، ئێمەش بەو یاسایە بەردەوامین و هەوڵی باشتر ئەدەین بۆ بەردەوامی هونەرەجوانەكانی كەركوك”.
لای خۆشیەوە چالاك سدیق راگری پەیمانگەی هونەرەجوانەكانی سەر بەحكومەتی هەرێم لە كەركوك وتی: “ئەگەر بچیتە هەر كەناڵێكی ئاسمانی رەنگە 40%ی دەرچووی پەیمانگاكان بێت بەوەی كەركوكیشەوە چونكە دەرچوی پەیمانگە جگە لەبوارەكەی خۆی لەزۆر شوێن دادەمەزران”، 
وتیشی: “ئێستاش كە دامەزراندن نییە و خوێندكار گەر لەترسی دامەزراندن رونەكاتە هونەرە جوانەكان خۆ هەر هونەرەجوانەكان نییە دامەزراندنی كەم بیت و هەمو بەشەكان و زانكۆكان وایلێهاتوە”.
هاوكات راگری پەیمانگەی هونەرەجوانەكان وتی: “دیارە بارودۆخی كەركوك بەراورد بەساڵی پار و پێرار هەڵبەتە لەروە سیاسیەكەوە كە نامەوێ زۆر بچینە وردەكاریەوە، ئاشكرایە كە كاریگەری لەسەر زۆر شتی تاكی كەركوكی كردوە و بەگشتی پەیمانگەكانی تریش لە هەرێم كەمبوونەوەی فێرخوازی هەیە و دۆخەكە لە ئاستی هەرێمدا گشتیە”.
چالاك سدیق ئاماژەی بۆ ئەوەش كرد: “هۆكاری تریش هەن لەوانە بوون و كردنەوەی پەیمانگەی بەدیل لە ئێستادا چ ئەهلیەكان و چ ئەوانەی بۆ كۆمپیوتەر و وەرزشی و نەوت و بابەتی ترن، ئەمەش وادەكات گەنج هەموی رو لە هونەر ناكات و هونەر هەڵنابژێرێت، جارانی خوێندكار هەبوو خۆی دەدزیەوە لە خوێندن و پلەكانی تری خوێندن لەبەرئەوە روی دەكردە هونەرەجوانەكان، ئێستا زۆر پەیمانگەی تر هەیە بەدیلی هونەرە”.
لەروی كەموكوڕیەوە راگری پەیمانگەی هونەرەجوانەكانی كەركوك وتی: “هەمو پەیمانگەكان لەم دۆخە كەموكوڕی هەیە و هەبووە، بەڵام ئێمە نەمان هێشتوە كاریگەری هەبێت و بەردەوامین وەكو ساڵانی تر و بەكەرەستەی ماوەی ساڵانی پێشو وەك هەردەزگایەكی تری حكومەت توانیومانە لە قەیراندا نەوەستین”.


‌ 125 جار بینراوه‌
9/29/2018 9:58:19 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved