»  پەڕەموچ
هەرچەند دەچمەوە ئەو هەوارە
ئارام مەلا عومەر



دەچمەوە ئەو هەوارە
لەشەن و كەوێكی شیعرێكم دا
ئازارەكانم بنوو سمەوە
چەند هەڵەم بەقەت ئەوەی پێوانە ناكرێ
ئاخە ئازارەكانی من 
ژان و ژاكاوی نەتەوەو نیشتمانێكە. 
ئەو دەمەی سروشت 
گۆرانی ئەشقی بۆ نیشتمان دەچڕی
پەریەكانیش بزەیان دەكەوتە سەرلێو
سەر لەبەری هیواكان چرۆ بوون
بە شنەیەك دەپشكوت.
ئەو دەمەی نیشتمان دەریاچەیەكی مەند بوو
ئاوێنەكەم بەدیواری یادگاریەكانەوە هەڵواسی
دەچومە سەر دەریاچەكەو
خۆم و خەون و خولیاكانمی نیشان ئەدام
یاقوتەكان جریوەیان دەهات 
لە ئەستێرەی سایەقەی بەر مانگەشەو دەچوون
پەریەكان قژیان لەبەر شانە دەكرد
گوڵزارەكان سەمایان دەكرد
بۆ سەداو شیوەنەكانی 
بولبولی ئەو كەنارە.
ئەم ئێستا بوونە بەخەون
هەرچەند دەچمەوە ئەو هەوارە
لە لێڵاوێكی مەند هیچی ترم نیشاننادا
نە یاقووت ئەبینم و 
نە ئەستێرەی سایەقەی بەر مانگەشەو.
هەرچەند دەچمەوە ئەو هەوارە
دەبینم شروشتیش بزەی لەسەر لێو بڕاوە
بێزارم لەگێڕانەوەی چیرۆكەكان
بە بیستنیان گوێی خۆم دە ئاخێنم
چونكە چیرۆك گەلی ئەو كەنارە
پشكۆن ئاگردانی دڵم داخ دەكەن.
شاباڵی خۆزگەكانم پیرە باز
تۆ لەكوێی سەرێك بەرزكە
لەو رۆژەوەی دەورانێكت كرد 
بە ئاسمانی نیشتمانا
ئیتر كەس چاوی پێت نەكەوتەوە
باز گەلێت جێ هێشت ووە
لە برسان خۆیان دەكێشن بەقەڵبەی مەرگ دا
سەگەكانی سەر زبڵخانی مێژو ش
مڕن لە گۆشتی ئاسك
نێرگزەكانی ئەم بەهارە
ڕوی خۆیان وەردەگێڕن لەئەشق
چونكە بەدیلی لەدایك دەبن
بەسەر دڵی وەك پشكۆوە هەڵ ناواسرێن
بۆیە بۆ دەست و دیاری نابن.
پەڕەسێلكەكان كە رۆیشتن
ماڵئاواییان نەكرد
ئەمەكداری دیوەخانی كوردەوارین
لەگەڵ چەكەرەی یەكەم گوڵ دێنەوە
دووای رۆژێك میوانداری 
دەرگای هێلانەكانیان دادەخەن و
لەگەڵ یەكەم جریوەو بادانەباڵ
ماڵئاوای دەكەن
نەلەئاوی لێڵ و نەلەخاكی شێرپێی پۆستاڵ 
هێلانە دروست ناكرێ
شوێنێك نەماوە بۆ باڵندەكان
چونكە چریكەیان بۆ بانگی ئازادیە.

‌ 347 جار بینراوه‌
10/6/2018 9:19:12 AM
Print Friendly and PDF
بابەتی زیاتر ...
راپرسی
?? ?????????? ??????? ???? ?? ??? ???? ??????

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved