نوێترین
روحانی: لەپاڵپشتیکردنی قەتەر بەردەوام دەبین   |    ئه‌مریكا داواده‌كات كێشه‌ی قه‌ته‌ر و وڵاتانی كه‌نداو گه‌وره‌تر نه‌كرێت    |    ته‌نها له‌ 1%ی موسڵ له‌ چنگی داعشدا ماوه‌   |    عه‌ممار حه‌كیم: كورد به‌شێكه‌ له‌ ڕۆحی نیشتمان   |    عیراق ١٠٠ ملیار دۆلاری پێویسته‌ بۆ ئاوه‌دانكردنه‌وه‌ی ناوچه‌كانی ژێر چنگی داعش   |    وه‌زیری كشتوكاڵ: ئێران به‌ڵێنی داوه‌ به‌شێكی ئاوی زێی بچوك به‌ربده‌نه‌وه‌   |    شوان داودی:نه‌قیی رۆژنامه‌نووسانی كوردستان پێنج کەس کارمەندی ئیداری و شوفێرەکەی وه‌كو شاره‌زا بۆ لێكۆڵینه‌وه‌ له‌ دۆسیه‌كی دادگا ده‌ستنیشانكردوه‌   |    عەدنان موفتی: ریفراندۆمێكی یاسایی‌و بەهێز پپێویستی بەپەرلەمانە   |    گه‌ریلاكانى هه‌په‌گه‌ باره‌گایه‌ك ده‌كاته‌ ئامانج كه‌ وه‌زیری ناوخۆی توركیای تێدابوه‌   |    له‌ هێرشێكی ئاسمانیدا له‌ ئه‌نبار ده‌یان تیرۆرست كوژران   |   
كوردی  |   عربي
»  پەڕەموچ
درەختی نیاز
حەمەكەریم عارف


( بەشی دووەم)

 جۆرە گومانێكی ئاڵۆز تێت وڕوكا بوو، لێكدا لێكدا لە ناوەوە دەتەپیت دەگریایت، بە كوڵ دەگریایت، هەستت دەكرد ئەوەی تۆ پێی ئاوس بوویت حەرامزادە بوو، خێری بۆ كەس نەدەدایەوە، تازە ناتوانیت لە باری بەریت، دوور نییە خۆیشت بەسەریەوە بچیت. زەحمەتە. كە رێگەیەكت هەڵبژارد، دەبێ رێگاكانی دی تەرك بكەیت... دەتڕوانیە ریزی ترومبیلان، كێ دەڵێت ئەو نێچیرەی تۆ بۆی لە كەمیندا بووی هەڵناگەڕێتەوەو ئەو تۆ راو ناكات!... غوربەتێكی سەیر لە دڵ‌و دەروونت وڕوكاوە، لە كەسێك دەچیت لە خوا بگەڕێ‌و لە بوونی دڵنیا نەبێت. گوێت دەزرنگێتەوە: “هەرگیز دەستبەرداری گومان مەبە، كە گومان نەما، مانای وایە لە جوڵە كەوتووی. بەڵام هەرگیز مەیەڵە گومان‌و دوو دڵی چالاكیەكانت گۆج و ئیفلیج بكات...”
هەستت بە بۆنێكی نامۆ دەكرد، پڕ بە كەپووت بۆنەكەت هەڵدەمژی، لە بۆنی چۆڵەوانی دەچوو، نا لە بۆنی دۆزەخ دەچوو، بەڵام دەترسایت ئەم رازە بۆ خۆت كەشف بكەیت. نەوەك لێت ببێ بە راست... دڵخۆشی خۆت دەدایەوە: باشترین رێگەی ئاوێتە بوون بە ژیان، نقوم بوون لە ژیاندا، رێگەی ئەشقە..
ئەو بۆنە دۆزەخیە بەرۆكی بەر نەدەدایت. دەتزانی رێگەی ئەشق پڕە لە كەمین، كە رێگەیەكت هەڵبژارد دەبێ رێگاكانی دی تەرك بكەیت. خودی كەمینەكە گرینگ نییە، تێی دەكەویت خەم نییە، كەی، لە كوێ، چۆن تێی دەكەوێت؟ ئەو پرسیارانە، وەكو گەلە گورگێكی لە برسا هار بووی كوێستانێكی سەراپا بەفر گرتوو گەمارۆیان دابوویت... دوو دڵ بووی هەر لە هەوەڵەوە بێهیچ كاردانەوەیەك تەسلیم بیت یان چارەنووسی خۆت بە بەرگرییەكی پێشوەختە دۆڕاو بسپێرێت! هەر زندوو و زندەوەرێك بەرخودانی خۆی هەیە، بەرخودان یەكێكە لە نیشانەكانی ژیاندۆستی!.. تەسلیم بوون ئەستەمە هەر خۆت، خۆت دەكوژیت، هێندە خۆت سەركۆنە دەكەی كە هەرگیز چاوت لەبەر خۆت هەڵنەیەت!..
غوربەتێكی سەیر تێت وڕوكاوە، لە پڕ دوو ئوتۆمبیل بە پەلە لە بەردەمت وەستان، چەند كەسێك دابەزین.. یەكسەر، بەرەو رووت هاتن، گزوگومەت بەر دەمڕێژی جنێویان دایت، پێت سەیر بوو، چۆنیان ناسیوویت، رەنگە بە هەڵە چووبن، پەلە مەكە، مەیكە بە هەراو هەنگامە، ئەدی خۆ هەروا بە ئاسانی خۆت بە دەستەوە نادەیت! نەخێر دەبێ‌ هاوار بكەی، خەڵكی خڕ بكەیتەوە، بە چاوی خۆیان ببینن كە ئەم دڕندانە، چۆن بە رۆژی روناك رۆڵەی خەڵك راو دەكەن، دەنگی ناڕەزایی رۆڵەی خەڵك دەخنكێنن، تا درێژە بە تەمەنی پڕ تاوانی خۆیان بدەن...
بەلاق‌و دەست، بە قەپ‌و گاز، كەوتینە بەرگری لە خۆت، خەڵكێكی زۆرتان لێخڕ بوونەوە، كۆمەڵێك سیخوڕی دیكەش هاتن بە هانای سیخوڕەكانەوە. لە نێوانیاندا (قەتران)ت ناسییەوە! سەیرە خۆ ئەمە دەیگوت فەرمانبەری پەروەردەو فێر كردنە! كەچی لە هەموویان بە هەڵپەترە بۆ بەرهەق كردنت! ئەمە دەگەڵ ماڵی حەمەی براتدا، كرێچی یەك ماڵ بوو... چەند جارێك لەوێندەر دیتبووت.. بە تایبەتی لەو كاتانەدا كە بنكە نهێنییەكەتان گیراو كەیهان بە برینداری گیرا... لەو چەند رۆژەی پێشووشدا یەك دوو جاران لەبەر زانكۆدا دیتت، خۆت لێ گێل كرد... بە هەر شەڕە شەقێك بوو لە پیرە ترومبێلیان پەستایت، بە نێو خەڵكەكەدا بردیانیت، بیرت لە گەوجێتی خۆت دەكردەوە، هەمووی دوو رۆژ بوو خۆپیشاندانی خوێندكارانی زانكۆ تەواو بوو بوو، كەچی هەر سا ناساتێ لەوێندەر قوت دەبوویتەوە! وات دەزانی دنیا شامی شەریفە، مەڕو گورگ پێكەوە ئاو دەخۆنەوە!.دەبخۆ دەردت بێ. ئەوانە ئاوهان، كەروێشك بە عارەبانە دەگرن، ئەوەتا قەتران وەزەنی خۆی كرد. زۆریش خۆی بە خوێنەوارو رۆشنبیر دەزانی، وشەی زل‌و قەبەو قەڵەوی بەگەڵ قسەكانی دەخست! كەچی ئەوەتا... هەوەڵجار بۆیە خۆی دوور گرتبوو، تا تۆ نەیبینی، هۆی گرتنەكەت بە نادیاری بمێنێتەوە. سیخوڕانیش بە ئارەزووی خۆیان فشەت بەسەردا بكەن، وا بنوێنن كە هیچ شتێكیان لێ ون نابێت، ئاگایان لە خشەی مارو مێرووە.. كەچی ئەوەتا دڕندەكەی ناخی پەتی پچڕی، لە هەموویان زیاتر پەلاماری دایت. بەر لەوەی لە پەلۆپۆ بكەویت‌و بەرهەقت بكەن، لە نێو ترومبێلەكەدا، یەكێكیان هەڵیكێشایە دەمانچە: هەر بجوڵێیتەوە دەتكوژم!
خۆت راپسكاندو شەقێكت خێواندە دەست‌و دەمانچەكەی، لە دەستی پەڕی، بە پەلە هەڵیانگرتەوە. فرسەتت هێنا، یەك لەقەت بە جامی پاشی ئوتومبێلەكەدا كێشا، وردو خاشت كرد... لەو دەمەدا پاسێكی پڕ لە خەڵكی رەت بوو، هەر چەند ئەوان سەیری تۆیان نەدەكرد، لێ تۆ بەسەر سڵاوت لێكردن.. سەیرە پێدەچێت مرۆڤ لە كاتی تەنگانەدا پتر هەست بە زەرورەتی پەیوەندی بكات!...
بە دەم رێوە، شەكەت‌و ماندوو، پڕزە لێبڕاو، بیرت لەوە دەكردەوە، چەند زوو كەوتیتە تەڵەوە! دەبێ لە زینداندا قەرەبووی ئەمە بكەیتەوە.. گوێت دەزرنگێتەوە: ئێمە لەم قۆناغەدا تەنیا شۆڕشگێڕاندنی خەڵكیمان لە سەرە.
بەدەم خەیاڵەوە بیرت لە فریاڕەسێك دەكردەوە، لە هەڵۆیەكی ئەفسانەیی دەكردەوە كە فریات بكەوێت، هێندەت بیر لە هەڵۆ كردەوە، لەبەر چاوی خەیاڵت بوو بەڕاست. بە چاوی خۆت دەتبینی وەكو خاڵێكی غەریب لە قوڵایی ئاسماندا باڵەكانی دەبزواند، لە ئاستی تۆدا بە شێوەیەكی بازنەیی دەسوڕایەوەو هەر جارەی پلەیەك دەهاتە خوارتر، ئەوەتا جوان جوان دەیبینی لەگەڵ هەر سووڕێكدا بەرجەستەتر دەبێت. هەڵۆیەكی سپی، ئەمە یەك هەڵۆی سپی ببینی! نیگا توڕە، چنگ‌و باڵ ئەفسانەیی، بەڵام مات‌و مەند، ئەوەتا وا بەسەر یاڵەكەی ئەو بەرتەوە دەنیشێتەوە، ئەوەتا لاقی گەییشتنە عاردی، بەڵام هێشتا هەر باڵەفڕێ دەكات. ئەوە جێگیر بوو. سەربەرزو بێباك بە نیگا دات دەبێژێت...
لە پڕ دەست بە چاوتەوە گرت، یەك دووجار هەڵتگڵۆفتن. كردنتەوە، نوقاندنتەوە.. چ دیمەنێكە، خەونە، راستە، خەیاڵە!... جوان دەیبینی، ئەوەتا فوارەی خوێن رێك لە ناوەندی سینگیەوە فیچقە دەكات‌و دەلەرزێ، دەلەرزێ، ئازای لە خوێنا هەڵدەكشێت، دەبێ بە گڕێك‌و بە ئاسماندا دەچێت... بەرز دەبێتەوە، بەرز دەبێتەوە، دەبێ بە خاڵێكی بچووك بە بەرۆكی ئاسمانەوە، دەسووڕێتەوەو دەسوڕێتەوە، بۆ مەداری خۆی دەگەڕێت.. هەڵۆ مەداری خۆی هەیە... چ دیمەنێكە!! گوێت دەزرنگێتەوە، ئەوەی بچێتە راِوی هەتاو دەبێ سووتانی لە بیر بێ.
***
بە دەست‌و چاوی بەستراوەوە گەیەنرایتە جێی مەبەست. دنیا تاریكە.. نازانیت لەم تاریكیەدا دەكەیتەچی! دەریایەكی یەجگار گەورە، بەسام لە نێوان تۆو خۆتدایە. تۆ بڵێی لەكام رێگەوە بگەیتە رۆخەكەی تری خۆت... گوێت دەزرنگێتەوە، عیبرەتی ژیان لەوەدایە بەشەكەی تری خۆت بدۆزیتەوە. ناسینی گەردوون لە ناسینی بەشەرێك ئاسانترە، ئەم بوونەوەرە جیوەییە نایەتە ناسین! زۆر زەحمەتە، بەشەر گیانی بە وشەیە، لە رێگەی وشەوە دەتواینێ‌ مێژووی خۆی، خودی خۆی، بەشەكەی تری خۆی بگێڕێتەوە... خوا ئەم دنیایەی بۆ گەمەی خۆی دروستكردووە، بۆ سەرگەرمی‌و رابواردنی خۆیەتی. لە سەر كەسیش ناكات، بێ منەتە لە هەر جۆرە پەیوەندییەك. ئەمە لە مرۆڤیشدا رەنگدانەوەیەكی كاڵی هەیە... خوا لە نێو وشەدایە، بۆیە بەشەر دەتوانێ لە رێگەی وشەوە پەیوەندی دەگەڵ خوادا پەیدا بكات. واتە رێگەی ئەشق... رێگەی ئەشق وەكو رێگەی ژیان راز ئامێزە، هەر شتێك راز ئامێز بێ مرۆڤ عەوداڵی خۆی دەكات، ڤیان‌و ئەشق بێ دڵدارو دڵبەر بوونی نییە، ڤیان‌و خۆشەویستی ئەنجامی ئاوێتە بوونی ئاشق‌و ماشووقە!.. كەواتە پەیوەندی ئەگەر مەحاڵ نەبێت، نیمچە مەحاڵە.. تەنیا خۆشەویستی فشە پەیوەندییەك چێدەكات. نیمچە ماقولیەت و مانایەك بە ژیان دەبەخشێت. دەنا ئاساییە دەستت بچێتە كوشتن، تەنانەت كوشتنی خۆتیش.. كە دەست چووە كوشتنی خۆت هەنگینێ ئاساییە.. دەوەرە دەست بچێتە كوشتن. بە خۆتیش وەكو پێویست نەزانی. هەر لەبەر ئەوەی هەبیت! بۆیە دەبێ بكوژیت، هەتا هەبیت. دەنا نابیت.. نابیت، نەكوژیت. دەبیت، دەكوژیت.. ناچاریت، دەبێ بەشداری لەم گەمە سەخیفەدا بكەیت، كە گەمەیەكی قێزەونە! ناچاریت، لێی وەڕز نابیت، نابێ ببیت، دەنا چ مانایەك بۆ بوونت نامێنێت... كوشتن ماناو ماقوولیەت بە بوونت دەدا.. دەبێ تا كۆتایی گەمەكە بەردەوام بیت. كەی كۆتایی دێت؟!
بیرەوەری زۆر بە هاسانی رۆژانی راِبردوو دەژێنێتەوە... نیگەرانی گەلێك، هیواو خۆزیای نەتەوەیەك ئاوسی كردبوویت، ئازای بەدەنی تەژی كرد بوویت، دەبوایە رابی دەنا دەیتاساندیت. سینگت دەتەقی. گوێت دەزرنگێتەوە: “هیچ رێگەیەك نییە بۆ نزیكی لە خەڵكی تەنیا ئەوە نەبێ كە یەكێك بی لەوان...”
چ بێدەنگیەكە! بێ سنوور، بێ كۆتایی، تا هەست بڕبكات هەر بێدەنگیە.. لەو جۆرە بێدەنگیەدا مرۆڤ دەلەوتێ.. لەشی، رۆحی پیس دەبێت. دەبێت بە دەعەجانی.. دەبێت شێوازێكی تازەی خۆ بسمیل كردن بدۆزێتەوە. دەنا دەبێت بەوەی ئەقڵ نەیگرێت... گێڕانەوە باشترین بسمیلخانەیە..
هەر ئەوەندەت هەست كرد، وەكو گڵۆڵە، غل بوویتەوە.. هەر غل دەبوویتەوەو تەق‌و هۆڕی بە سام گەمارۆی دەدایت. تا هەست بڕبكات هەر تاریكی بوو... مرۆڤ لە تاریكیدا دەلەوتێ... گوێت دەزرنگێتەوە، دەنگی داپیرەتە: “هەبوو نەبوو، كەس لە خوا گەورەتر نەبوو، كەس لە بەندەی خراپ روو رەشتر نەبوو، ژنێك هەبوو كیژێكی زۆر ناسك‌و نازداری هەبوو. ئەم كیژە رۆژی لە نێو مێرگ‌و گوڵزاراندا، دەگەڵ دەستە خوشكانیدا بەسەر دەبرد. ئێوارەیەك دایكی بۆ ماڵ گەڕایەوە، كیژە جوانەكەی وەكو رۆژان بە شادییەوە بە پیرییەوە نەچوو. دایكە سەری سوڕما.. كون‌و كەلەبەری ماڵ گەڕا، هیچ سۆراخێكی دەست نەكەوت! زۆری پێ سەیر بوو، نیگەران‌و خەمین لە فكران راچوو.. لە دڵی خۆیدا گوتی: جوانی زۆرجار بەڵایە، هەبێ‌و نەبێ رفێنراوە.. دێوو درنجان خۆیان گەیاندووتێ‌و رفاندوویانە. چ بكات چ نەكات! بەو تاریكە شەوە روو لە كوێ بكات! بە پەلە خۆی گەیاندە گڕكان، لەبەری پاڕایەوە، واریقات‌و بەسەرهاتی خۆی بۆ گێڕایەوە. تكای لێ كرد رێی بدات چاوانی لە تیشكی گڕكان هەڵكێشێت‌و شەوان ببنە مەشخەڵی رێگەی گەڕان‌و تاقیبكردن... گڕكان دڵی نەرم بوو، رێگەی دا.. دایكەی بەلەنگاز كۆمەڵێك منەتبار بوو، دوعاخوازی لێكردو وەڕێكەوت. رووی دەكردە هەر تاریكستانێك دەیكرد بە رۆژی روناك، لێ بێهودە هیچ هەواڵێك لە كیژەكەیەوە نەبوو. شەكەت‌و ماندوو لە گوێ روبارێك رۆنیشت.. لە پڕ شتێكی بەرچاو كەوت، بەسەر ئاوەكە كەوتووەو شەپۆلان بەرەو كەناری دەهێنن. خۆشیەكی كوت‌و پڕ كەوتە دڵی، پشتێنی كیژەكەی ناسییەوە. دایكە لە دەورت گەڕێ، بە قوربانی ئەو ئەقڵ‌و ئاوەزەت بم كە ئەم قوڵاخەت بەجێهێشتووە... لە پڕ شەبەنگێكی لێ پەیدا بوو: كیژەكەت پاشای مەملەكەتی تاریكی رفاندوویەتی. فریای بكەوە!
ئیدی شەبەنگەكە ئەوەندەی گوت‌و دیار نەما، كەس نەیزانی زەوی قووتی دا، ئاسمان هەڵیكێشا!... دایكەی بەستەزمان ما بگری، لە خۆی بدات. بپاڕێتەوە، بلاڵێتەوە.. لە پڕ دەنگێكی هاتە گوێ، دەنگێك بۆنی ئاوەدانی بە كەپویدا دا.. هەندێ دڵنیایی‌و ئۆخژنی لە دڵ‌و دەروون گەڕا. بڕۆ، مەوەستە، خێراكە، خۆت بگەیەنە مەملەكەتی تاریكی. خێراكە تا لەوێندەر هیچ خواردنێكی دەرخوارد نەدراوە، گەر فریا بكەوی، پێش ئەوەی خواردنی ئەوێندەر بخوات، چنگت دەكەوێتەوە. هەستە دەی، مەحتەل مەبە..
تۆش شتێكی لەو بابەتەت كرد، كردت بە هەراو هەنگامە، دنیات لێتێگەیاندن: دزانی خوێڕی‌و تۆڕِی.. تازە خەڵكی پێیان زانیم! نیشانەیەكم بە جێهێشت..
دەبێ ئەمە چ نهێنییەك بێ! دوور نییە جۆرە پەلەقاژەیەكی وەدەستهێنانی نەمری بێت، بەرپەرچدانەوەی نەمانە!.. ترسانە لە گۆڕگومی!... گوێت دەزرنگێتەوە، دەنگی كەیهانە: تەنیا بە یەك شت رەسەنایەتی پەیدا دەكەیت، ئامانجێك بخەیتە دڵی خۆت، لە پێناویا بژیت، لە رێگەیدا بمریت.. بەمە ئاوێتەی روحێكی نەمر دەبیت...


‌ 125 جار بینراوه‌
5/27/2017 11:32:31 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved