نوێترین
روحانی: لەپاڵپشتیکردنی قەتەر بەردەوام دەبین   |    ئه‌مریكا داواده‌كات كێشه‌ی قه‌ته‌ر و وڵاتانی كه‌نداو گه‌وره‌تر نه‌كرێت    |    ته‌نها له‌ 1%ی موسڵ له‌ چنگی داعشدا ماوه‌   |    عه‌ممار حه‌كیم: كورد به‌شێكه‌ له‌ ڕۆحی نیشتمان   |    عیراق ١٠٠ ملیار دۆلاری پێویسته‌ بۆ ئاوه‌دانكردنه‌وه‌ی ناوچه‌كانی ژێر چنگی داعش   |    وه‌زیری كشتوكاڵ: ئێران به‌ڵێنی داوه‌ به‌شێكی ئاوی زێی بچوك به‌ربده‌نه‌وه‌   |    شوان داودی:نه‌قیی رۆژنامه‌نووسانی كوردستان پێنج کەس کارمەندی ئیداری و شوفێرەکەی وه‌كو شاره‌زا بۆ لێكۆڵینه‌وه‌ له‌ دۆسیه‌كی دادگا ده‌ستنیشانكردوه‌   |    عەدنان موفتی: ریفراندۆمێكی یاسایی‌و بەهێز پپێویستی بەپەرلەمانە   |    گه‌ریلاكانى هه‌په‌گه‌ باره‌گایه‌ك ده‌كاته‌ ئامانج كه‌ وه‌زیری ناوخۆی توركیای تێدابوه‌   |    له‌ هێرشێكی ئاسمانیدا له‌ ئه‌نبار ده‌یان تیرۆرست كوژران   |   
كوردی  |   عربي
»  پەڕەموچ
درەختی نیاز
حەمەكەریم عارف


( بەشی سێیەم وكۆتایی )
لە ئوتومبێلەكە دایان گرتیت، دڵت بەوە خۆش بوو كە نیشانەیەكت بەجێهێشتووە. خەڵكانێك ئاگایان لە گرتنەكەت بوو!... هەستت بە جۆرە رەسەنایەتیەك دەكرد. ئامانجێكت بۆ خۆ داناوە، لە پێناویا دەژیت، لە رێگەیدا دەمریت. بە راستی ئەمە كارێكی سەیرە، ئاوێتەی روحێكی یاخی‌و نەمرت دەكات! لە ناخی ناختدا هەست بەمە دەكەیت!.. لە ئوتومبیلەكە دایانگرتیت، پڕ بەزار هاوارت كرد، ناڕازی بوویت... لە راڕەوێكی دوورو درێژدا بەر پاڵیان دایت. نەخێر لە دواوە بە شاپان تێت بەر بوون. كەوتیت، هەڵیانساندیتەوە، بەر پاڵیان دایتەوە، گەیاندیتیانە ژووری پرس‌و جۆ.. بیرت لەوە دەكردەوە كە چ زانیاریەكیان دەربارەی تۆ هەیە!.. گوێت دەزرنگێتەوە. دەنگی مەسعوودی براتە... نەكەی هیچ سڕێك بدركێنی، ئەمە ئەشكەوتێكی هەزار لۆیە، دۆزەخە، هەر نهێنییەك لێرە بدركێنی ئیدی گەڕانەوەت نابێت، دنیای روناك بەچاو نابینی، هەوڵبدە رابردوو لەبیر خۆت بەریتەوە، لە مێشكی خۆتی بسڕەوە، نەبادا لە شێوەی بیرەوەریاندا بژێتەوە وهەرچی نهێنییەكت هەیە، سەر ئاو بكەوێ‌و كەشف ببێت. لە كاتی وادا دەبێ رابردووت بكوژیت... رابردوو تۆماری مردووانە!.. ئاوڕ نەدەیتەوە ها... ئەمە ئەشكەوتی تاریكیە، تەنیا بە ئاوڕنەدانەوە، لێی دەرباز دەبیت ها!... دەنا دەبێت بە شوێنی یەكجارەكیت.. تۆو ئێستا، هەر خۆت‌و ئێستا، نە رابردوو هەیە نە داهاتوو، نەخەڵەتابی چ كەسێك، لایەنێك بكەیت بە شەریكی ئێستات، هونەری خۆت لە ئێستادا بنوێنە.. گەر سەركەوی، هەموو كەس مەمنوونە ببێ بە شەریكت.. بەڵام كەس ئامادە نییە خۆی بكات بە شەریكی بەزین‌و دۆڕانەكانت... تەبیعەتی مرۆڤ وەهایە. ئیدی چۆن سەردەكەوی، بۆ خۆت سەربكەوە.. تۆ ئێستا شارێكی گەمارۆ دراویت، قۆ شەن‌و لەشكری دژمن دەوری داویت، نەكەی دەروازەكانت بخەیە سەر پشت. چونكە تەسلیم كردنی شار لە هەر خیانەتێك گەورەترە، خیانەتە دەرهەق بە خۆت، بە وانەی هەنووكە لە هزری خۆیاندا، داستانی قارەمانیەتیت بۆ دەهۆننەوە. لە دڵی خۆدا دەتكەن بە رەمزو نیشانەی قارەمانیەتی خۆیان!... هەوڵبدە كلیلەكانی ئەو شارە ون بكە. تۆ هەنووكە فەرمانڕەوای هەوەڵ‌و ئاخیری ئەو شارەیت، بڕیاری هەوەڵ‌و ئاخیر لە دەستی تۆدایە. خۆت تەسلیم بكە، بەڵام نەخەڵەتابی ئەو شارە تەسلیم بكەی! هەر نارچار بوویت، لە شار وەدەركەوەو تەسلیم بە، هیچ نهێنییەكی شار نەڵێی، دەنا سیحری مرۆڤانیت بە تاڵ دەبێتەوە، ئیدی هەتا هەتایە لە هەموو لەزەتێكی مرۆڤانی مەحرووم دەبیت.. هیچ نهێنییەكی شار نەدركێنی، هیچ كلیلێكی تەسلیم نەكەیت، دەنا جارێكی دی دەرگات لێناكاتەوە. ئەگەر بشفڕی، ببی بە باڵندەش بێسوودە، نە ئاسمان دەتگرێتە خۆو پێشوازیت دەكات، نە مەلان رازی دەبن تێكەڵیان ببیت... تەسلیم مەبە، هەر بەمەش مرۆڤانی مرۆڤ بە دیار دەكەوێ، رۆژگاریش دروستی ئەمەت بۆ دەسەلمێنێ. رەمزییەت پەیدا دەكەیت، خەڵكانێك بە رێزەوە دەستت بۆ لە ملی دەدەن، رەنگە لە ژیانتا بۆ چركەیەك تێكەڵاو نەبووبیت، ئیدی رەمز وایە، ئەو، كەس ناناسێت، شەرمیش نییە، كەچی هەموو خەڵكی ئەو دەناسن، ئەگەر كەسێك نەیناسێت، ئیدی دەبێ بە لۆمەچی خەڵك‌و خوا... نەكەی ئەو هەڵەیە بكەی، چونكە لەو هەڵانەیە كە مەرگیش نای سڕێتەوە. دوا هەڵەی كوشندەت دەبێت!.. خۆت بگرە با بمێنی، مان باشترە لە مەرگ، هەر هیچ نەبێ لە ماندا دەرفەتی ئەوەت دەبێت خۆت بگێڕیتەوە، وەكو چۆن خودت دەبینی ئاوها بیگێڕیتەوە. دەنگی مەمەد لە گوێتدا دەزرنگێتەوە: “وای دابنێ ئێستا مردوویت، دنیا هەستێ، قیامەت رابێ‌و كەعبە كەچ بێ، تازە بە ئەندازەی نووكە دەرزییەك گۆڕان بەسەر ژیانتدا نایەت، مەحاڵە، چ شتێكی دی، چ رووداوێكی دی بخرێتەوە سەر كۆی رووداوەكانی ژیانت...
***
هێشتا لە هیچ شوێنێك نەگیرسابوویتەوە، بە دەم دەمڕێژێ جوێنی زۆر بازاڕی‌و پیسەوە، قەحپەی بەنگكێش... تا ئێستا چەند زۆڵیان پێفڕێ داویت... پاس پاسێنیان پێدەكردیت، بگرە كوێت دێشێت، بە مست، بەلەقە.. بە كێبڵ، جلەكانی بەرت شڕو وڕ بوون. پاش تۆزێك كابرایەكی رەزا قورسی ناشیرین، یان خۆت پێشوەختە، لە رووی دەروونیەوە خۆت ئامادە كردبوو هەموو ئەوانە رەزا قورس‌و ناشیرین بدینی، هات بەسەرا، وا خۆی دەنواند لە هەموو شتێك بێئاگایە. ئەم بیژو حەرامزادانە خۆسەری وایان لێكردیت!.. هەركە دەركەوت جەلادەكان وەكو سەگێك شەرم لە خاوەنەكەی بكات، لێت دوور كەوتنەوە. نیگایەكی لە نێوان تۆو جەلادەكاندا هێناو برد، ئەوجا بە دەنگێكی پڕ لە سەرزەنشت‌و گلەییەوە بۆڵاندی: “شاری بێ حاكمە! ئاخر چیتان لە كیژۆڵەیەكی ئاوها دەوێ، نابێ تۆزێك تەربێت‌و ئەدەبتان هەبێت! خۆ هەرچیەكتان دەوێ، دەتوانن بە قسەی خۆش لێی بپرسن‌و ئەویش وەڵامتان دەداتەوە..
لە دڵی خۆتا گوتت مینا، لە خشتەت نەبا! ئەم رێگا نزیكە ‌و ئەم كرێبارە چەورە سڕێكی تێدایە ها!
“... لاچن دەی، چۆن خوێڕی‌و توێڕی كارمان لێتێكدەدەن!”
هەوڵیدەدا، سیمای تاوانباری لە ژێر پەردەی ریاكاری‌و ساختەچێتیدا بشارێتەوەو دڵسۆزی خۆی بنوێنێ. هاتە پێشەوە:
- تۆ ئەگەر قازانجی خۆت دەوێ، دان بە هەموو شتێكدا بنەی باشترە..تۆ هێشتا هەوەڵی عەمرتە، نازانی بەری دنیا بەكوێوەیە.. گەورەترین عەیبی قۆناغی لاوی سادە ئەندێشیە..خەیاڵپڵاوییە.. ئەگەر بڵێم تۆ بەگرتدراوی باوەڕ ناكەیت! تۆ هاوڕێكانی خۆت بە گرتیان داویت!.. تۆ ئەو سەرە داوەی كە دراویتە دەستێ ئێمە‌و هەر بەم سەرە داوەش دەگەینە كونجی ئەو خەڵوەتخانەیەی كە تۆ بە خەیاڵی خاوی هەرزەكاری خۆت، رەنگە بە بنكەی شۆڕش‌و شۆڕشگێڕی بزانیت.. وەرە ئەدرەسی بنكەكەی خۆتمان بدەیە. هاوڕێكانت هەر دەگرین دەگرین.. رۆژێ زووتر بگیرێن باشترە، چونكە كەمتر تووشی تاوان دەبن..و حەقیقەتی ئەم گەمە دۆڕاوەیان بۆ بە دیار دەكەوێت كە تێی كەوتوون‌و دەستیان داوەتێ. یان خەڵكی لە نێو دەبەن یان خۆیان لە نێو دەبەن.. ئاخر حەیف نییە!
***
سەیرە! كێ تاوانبارە! هەركەسەو لای خۆیەوە بەرانبەرەكەی بە تاوانبار دەزانێت!.. هاوڕێكانت هەر دەگیرێن دەگیرێن... نەكەی مینا، با بگیرێن، نەكەی ئاوڕ بدەیتەوە.. بە ئاوڕ دانەوە هەموو شتێك لە دەست دەدەیت... نەكەی ها! هەموو رابردوویەك بسڕەوە، هەموو پەیوەندییەك فەرامۆش بكە.. كەس ناناسیت! رابردووت نییە، ئێستا لە دایك بوویت.. نەكەی باوەڕ بدۆڕێنی، باوەڕ سەرچاوەی هەموو خۆ راگرییەكە. باوەڕ بە خۆت بێنە، وابەستەی خودی خۆت بە، كەس ناناسیت، هەر خۆت بناسە.. لێرە تەنیا من هەیە، ئێمە، نامێنێ. تەمەنێكت هەیە، بیرەوەرییەكانی ئەم تەمەنە بەشی ئەوەندەت دەكات تامردن لەگەڵیاندا بژیت‌و هەست بە تەنیایی نەكەیت، هەموو كاژێكی پەیوەندی رابردوو فڕێبدە، چاڵێكی قووڵی قووڵ لە خۆتا هەڵكەنە، خۆت بۆ ئەو چاڵە قووڵە بگێڕەوە.. هەموو ساتێ خۆت تازە بكەوە، دەنا دەمریت، ئەم تاریكستانە قووتت دەدات. هەر بە منداڵی بمێنەوە.. لێرەدا، لەم هەزار ریانی گومانەدا، دەبێ خۆت رێگایەك بدۆزێتەوە.. “كە رێگەیەكت هەڵبژارد، دەبێ رێگاكانی دی تەرك بكەیت.” خۆت نەكەی بە پەند‌و بنێشتە خۆشەی ژێر ددانی هەموو كەس‌و ناكەسێك.. نەیەڵی روحی سەركێشێت كەوی بكەن، مینا، تۆ لە سەر هەزار ریانێكی گەلێك سامناكدایت ها! رابردووت كەوتووەتە گیانەلڵا‌و هەرچی دەكەی ئێستات لە دایك نابێت! پێوەی جەڕیووی! چ هەراو هەنگامەیەك لە ناختدا بەرپا بووە! مرۆڤ لە بۆشاییدا هەڵناكات! هەست بە داڕوخانێكی بەلەزەت دەكەیت... ئەمە سەرەتای حاشاكردنە لە رابردوو، ئیدی بەرە بەرە رابردووت لە كۆڵ دەبێتەوە، تەنیا ئەمە دادت دەدات. نەكەی ئاوڕ بدەیتەوە، دەنا هەموو شتێك لە دەست دەدەیت..
تۆ سەیری سیمای، نیگای، قوڕمساغی لێدەبارێت، لە دڵی خۆدا گوتت: نەی خۆی تاڵە! خوێڕی، دژمنی خەڵك، خەیاڵت خاوە... گوێت دەزرنگێتەوە، دەنگی مەمەدە: “هیچ رێگەیەك بۆ نزیكی لە خەڵك نییە، تەنیا ئەوە نەبێ كە یەكێك بی لەوان، پێویستیان بە رێنوێنە، رێنوێن بە خۆو فانۆسێكەوە، دەڕوات، نابێ بێڵێ فانۆسەكەی دسەتی بكوژێتەوە، چونكە ئەگەر تروسكەیەكی بچووكیش بێ، هەر باشە، نابێ بكوژێتەوە، كە كوژایەوە خەڵكی گوم دەبن، رێی گەڕانەوە ناناسنەوە.. تروسكە، ریَِگەیە بۆ چراخان..”
خەیاڵت خاوە، هەی بەد فەساڵی، رەزا قورس، منداڵت بە گیر نەهێناوە، هەر وا بەو ئاسانییە كلیلی شارت تەسلیم ناكرێ.. دەتوانی ئەو شارە وێران بكەی... بەڵام ئەو ئاواتە دەبەیە ژێر گڵەوە كە بتوانی فەتحی بكەیت!
لەم شوێنانەدا، جنێو ورە وەبەر مرۆڤ دەخات، لە دڵی خۆتدا كەوتیتە جنێودانی: بێ شەرەفی هیچ‌و پوچی خوێڕی، خەیاڵت خاوە بەو ئاسانییە فەتحم بكەی.. رەنگە بتوانی وێرانم بكەیت، بەڵام فەتح كردن، لە مێشكی بۆگەنتی دەربێنە...
هەستت كرد، سیمای دەگۆرێت، وەك بڵێی خەیاڵتی خوێندبێتەوە، نیگای هەڵبڕی، هەستت دەكرد، قوڕمساغی لە نیگای دەبارێ، رووی كردە پیاوەكانی: ئادەی بەربنە ئەم قەحپەیە!
لە هەر چوار لاوە بەر دەمڕێژی جنێو درایت. وەكو سەگی مەشقدراو لێت خڕ بوونەوە، خێرا بە تەختێكەوە بەستیانیتەوە. ژوورەكە پڕ بوو لەوان، رق كوێری كردبوون، رقیان لە هەر كەسێك بوو وەكو خۆیان نەبێ، تەنیا بە جەستە زندوو بوون، دەیانویست بە هەر رێگەیەك بووە، هەموو كەسێك لە قاڵبی خۆ بدەن، یان وەكو ئەوان بن یان نەبن!..
یەكێكیان، بە سیما هێدی‌و هێمن‌و مەنگ بوو، مرۆڤ تەبیعەت‌و مجێزێكی توندو توڕەی لەو دیو ئەم هێمنیەوە دەخوێندەوە.. چاوانی زەردی لێڵ، لێوی ئەستوور، دەموچاوێكی گۆشتنی ئامال زەرد، لە تۆ وایە پەیكەرێكی بێ جوڵەیە، سێبەری زەردەخەنەیەكی نا مەفهووم، بەسەر سیمایدا باز بازێنی بوو، لە قسەكانی ئەواندا بۆت دەركەوت نێوی “قەتران”ـە، ئەم ناوەت بیستووە، ئەم پیاوەت دیتووە!.. بیر بكەوە، ئا دراوسێكەی ماڵی حەمەی براتە! بەو ناوە بانگیان دەكرد!! دیاربوو ئەشكەنجەچی ئەسڵی بوو، وەكو قەلەموونی پایزان خۆی پڕ با كرد. شەلاخێكی رەشی مارئاسای بە دەستەوە بوو، تفی كردە نێو هەردوو ناو لەپی‌و بە شێوەیەكی هونەریانە شەلاخەكەی ئەم دەست‌و ئەو دەست پێكرد... لە دڵی خۆدا گوتت: شەلاخكاریە، پێدەچێت شەلاخكارێكی كۆنەكاری كارامەبێ! روانییە لێوەكانی، بە شێوەیەكی سەیر دەیجوڵاندن، لە تۆ وایە دەیەوێ هەندێ قسان كاوێژ بكات‌و بۆی نایەن. جنێوێك تاسەر لێوی هات، نازانی بۆچی قووتی دایەوە!.. ئەوجا زمانی وەكو ئەوەی مقەستی دۆمان بێ‌و تازە تیژ كرابێتەوە، بەر بوو. بەدەم دەمڕێژی جنێوەوە كەوتە شەلاخكاریت، ژێر پێیەكانتی دەرخواردی قامچی دەدا، هەستت بە ئازارێكی زۆر كرد. هەموو شتێك لە بیر خۆت ببەوە، تەنانەت ئەم ئازارەش لە بیر خۆت بەرەوە.. گۆرانی بڵێ، تا زیاتر بیڵێی لە ناخی ناختدا بە هێزتر دەبیت، گۆرانی هەموو ترسێكت لێ دەڕەوێنێتەوە. زۆر جار مانای گۆرانیەكە وەكو پێویست دەرك ناكەیت، سەربهووردو حیكایەتی گۆرانیەكە نازانی چییە، لە كوێندەرەوە هەڵقوڵاوە. بەڵام قووڵترین ئارەزووت دەهاڕوژێنێ، ئەدی مەعنای چی، وەڵامی پێداویستییە روحییەكانت دەداتەوە، پاراوی دەكات. لەبەر لێزمەی شەلاخدا بە رووت‌و قووتی وەكو ئەوەی نەیجەیەك بیت‌و هەوا فووت پێدا بكات، كەوتیتە گۆرانی چڕین: خەڵكی تەنیا ئەو شتەیان بیر دێت كە تێی دەگەن، خەڵكی تەنیا ئەو شتە دەگێڕنەوە كە دەتوانن بیكەن بە ئەفسانە. مەترسە، لە مردن هێوەتر نییە، هەنگینێ مردن ئەوپەڕی سەركەوتنە. لە هەموو دەسەڵاتێك رزگار دەبیت. دەبیت بە خۆت، نەخەم، نە ئازار، نە قسەو قسەڵۆك، نە خازووق، نە قسەی ئەم‌و ئەو نە مەحكەمەی زۆرداران، هیچیان پێت ناوێرن.. نا، مردن ئاسانە، ترسی ناوێ، بە تایبەتی تۆ، كە حیكایەتی خۆت، بۆ ئەو چاڵە قووڵە گێڕایەوە كە لە خۆتا هەڵتەكەندووە، ئیدی بزانە چۆن دنیا دەبێت بە نەیجەزار، و دەگەڵ هەر شنە بایەكدا، میداسەكانی دەسەڵات لە قاو دەدات‌و هەموو كەس دەزانن كە هەر میداسێكی دەسەڵات جووتێ گوێی هەن چوون گوێی خەڕ... قسە كەوتە زارێ دەكەوێتە شارێ.. گوێت دەزرنگێتەوە، دەنگی مەمەد: ئەركی ئەم قۆناغەی ئێمە تەنیا شۆڕشگێڕاندنی خەڵكە.
***
دەمێكە... نیوە شەوێكی درەنگ بوو، پاسەوانێك هات بە شوێنتا، بە چاوی بەستراوەوە بردتی، بە چەند راڕەوێكی پڕ پێچ‌و خەمدا بردتی، دڵت زۆر دەترسا!. گەیاندیتیە شوێنێكی كڕو كپ، بە سام‌و ترسناك، پێی گوتیت چاوت بكەوە، بەڵام سەیری دواوە نەكەیت، ئێستاشی دەگەڵ بێ باوەڕت بە چاوی خۆت نەدەكرد.مەمەد! بوو بوو بە داسك‌و دەرزی، غارت دا، لە باوەشی بگریت. پاسەوانەكە توند مەچەكی گرتیت، بۆ كوێ!؟ مەمەد نیگای هەڵبڕی، نیگات لە نیگای هەڵەنگوت... تا زارت گرتی بانگت كرد:مەمەد گیان! پاسەوانێك تێی خوڕیت.
- بێدەنگ، تەنیا بۆت هەیە تەمەشا بكەیت.
دیسان تەكانت دا، بەرەو مەمەد بڕۆیت، مەمەد دەستەكانی لە پشتەوە بەسترا بوون، پەتی سێدارەیان لە مل كردبوو، لە سەر كورسیەكی بەرز رایان گرتبوو، سەراپای بوو بوو بە نیگاو روانین، نیگایەكی ماندوو، لێ سەرڕێژ لە ئەشق‌و ڤیان، بزەیەكی كاڵ كەوتە سەر لێوی، بە دەنگێكی كز، وەك ئەوەی لە بنەبانی ئەشكەوتەوە بێ گوتی:
- مینا، باش بوو دیمیت، تاقیبی خالید بكە، خالید بدۆزەوە!
پاسەوانەكەی تەنیشتت توند دەستی گرتیت.. گوێ بگرە، جەنابی حاكم دەیەوێ قسەت دەگەڵ بكات، ئاوڕ نەدەیتەوە، تەنیا گوێ بگرە، ئازای ئەندامت بوو بوو بە یەكپارچە رق ونەفرەت دەنگێك لە پشتەوە هات: “ ئەگەر ئامادەبی ئەو كورسیەی ژێر پێی ئەم خاینە لابەریت، شەرت بێ بە شەرتی پیاوان، لە ئێستا زووتر نییە، ئازادت دەكەم!
چاوت لە مەمەد گواستەوە، خۆت لە دەستی پاسەوانەكە راپسكاند، ئاوڕی پاشەوەت دایەوە، نیگات لە دوڕ نیگای گوایە حاكمەكە بڕی، تا دەمت گرتی تفێكت كردە چارەی! توخوا تۆ بەشەریت..فەرق لە بەینی بەشەرو ئینسان زۆرە!! ویستت پەلاماری بدەیت، پاسەوانێكی دی توند گرتیتی. دادوەرەكە هەڵیكێشایە دەمانچەو یەك فیشەكی نا بەسەر مەمەدەوە، پاسەوانێك لەقەیەكی بە كورسیەكەی ژێر پێیدا كێشاو مەمەد كەوتە بۆشایی‌و بە پەتەكەوە شۆڕ بووەوە، بە دەم نەرمە سەماوە، لە تۆ وایە بانگی ئەشق دەخوێنێ..
***
تەمەنێكە، دوای بیست ساڵ، كە لە زندان ئازاد بوویت، پێت نابووە تەمەنی پیرییەوە، دایكایەتی خۆت دابوو بە كۆڵاو بە تەنیایی خۆتدا دەتگێڕا، شەو نەبوو خەون بە خالیدەوە نەبینی.. لە خەوتا ژنێكی جوان، قژ پەریشان، چاوشین، وەكو تاریكی ئەو زندانەی كە تۆی تیا بووی قووڵ دەیاننواند، دەهاتە دیار سەرت، دەیگوت: خالید دوای ئەفسانەی نەمری كەوتووە، بڕۆ خۆت بگەیەنە ئەوێ. چیایەكی لێیە بەسام، خەڵكی ئەوێ پێی دەڵێن بە رۆژ، بە قەد پاڵی ئەو چیایەوە، بە بەرزییەوە، دارسنۆبەرێك هەیە، سەدان تیلماسكە پەڕۆی رەنگاو رەنگی پێوە گرێ دراوە، گرێی نیازە...
گوێت دەزرنگێتەوە، دەنگی مەمەدە، چ دەنگێكی زندووە: -مینا باش بوو دتمیت، تاقیبی خالید بكە، خالید بدۆزەوە...
لە شەقەی باڵی خەیاڵت دا، بەدەم فڕینەوە، دڵخۆشی خۆت دەدایەوە، تاڤگە، كۆساران، جەنگەڵ‌و لێرەواران ئەو شوێنانە كە روحی زەوی بە زۆری لەوێدا دەگەڵ مرۆڤدا یاری دەكەن، پێدەكەنن‌و دەپەیڤن...
گەییشتیە بناری چیای بە رۆژ، دار سنۆبەرەكەت بەدی كرد، چ سامێ، چ جوانیەكی غەریب!.. شەكەتی سەفەری خەیاڵ بوویت، با جارێ چاوێ گەرم بكەیت، هەركە چاوت لێكنا، كونی فرمێسكانت بەربوو، گریای ئەمما گریان، فرمێسك بوون بە روبارێكی مەنگ، دارسنۆبەرەكەو هەڵۆكەو خۆتی راِماڵی، هەزاران هەزار وردە شەپۆل، بەدەم زەمزەمەیەكی راز ئامێزەوە بە رێیان دەكردن!..



‌ 102 جار بینراوه‌
6/3/2017 11:02:17 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved