»  پەڕەموچ
چاوشاركێ نوستالیژیایەك زیاتر لە یاری منداڵان لە تابلۆی هونەری یاسین حەسەندا
را: عەبدولڕەحیم سەرەڕۆ


گەڕانەوە بۆ تافی منداڵی بە تەنها گەڕانەوە نییە بۆ تەمەنێك بەدەم غوباری مێژووی بەسەرچوەوە، بەڵكو گەڕانەوەیەكی سەرجەمیانەیە بۆ شوێن و كات، هەست و هزرو لێكدانەوەكان، گەڕانەوەی تێكرای بوونە لە سەردەمێكدا دیزاین و داڕشتن و پێكەوەنانی ژیان و ماڵَ و ژینگە لە ستارگەی خودیدا بەرجەستە بووە، ئەو دەمانەی ژیان سادەبوو، منداڵیی جیهانێك بوو دوور لە ئێستاو هاوبار دوور لە ژیانی منداڵانی ئەم سەردەمە، هەرچەندە ئێستاش یاری چاوشاركێ لەناو منداڵی كوردا هەیە، بەڵام لە گەرموگوڕی كەوتووەو كەمتر لە جاران دەبینرێت و ئەم كزبوونەش بێ سێ ودوو دەروازەیەكە بۆ ئاوابوون و نەمانی یەكجارەكی.
ئەحلام موستەغانەمی لە رۆمانی (الاسود یلیق بك)دا دەڵێت:”ئەوەی ئازارمان دەدات ئەوە نییە كە دەستمان پێی نەگەیشتووە، بەڵكو زیاتر ئەوەیە كە لە كاتێكدا هەمانبووەو تا هەتایە هەست بە لەدەستدانی دەكەین”، یەكێك لەو هەرە گرنگانەی كە مرۆڤ هەمیشە ناتوانێت قەرەبووی بكاتەوە سەردەمی منداڵییە كە لە ناكاو لە مێشكماندا بە خۆشی و ناخۆشییەكانەوە بە شیرینی و تاڵیەكانەوە سەرهەڵدەدات، بەڵام هەرگیز هەموو مرۆڤەكان وەك یەك دركی پێ ناكەن و هاوكات زۆر دەگمەنن ئەو كەسانەی بتوانن هەموو وردەكارییەكانی ژیانی منداڵی لە بۆتەیەكی دیاریكراودا رووبەری خۆی پێ بدەن.
تابلۆی “چاوشاركێ” ئەگەرچی لە ساڵی 2013 كێشراوە، بەڵام بابەتەكە بەپێی كۆمەڵە نیشانەیەك وەك داڕشتنی قژی سەرو جلوبەرگ و هاوكات شێوەی دیوارو دەرگاو زۆر شتی تریش بە بینەر دەڵێن دەگەڕێتەوە بۆ چەندین دەیە بەر لە ئێستا و لەناو كۆمەڵە رەنگێكی سادەدا دەمانخاتە بەردەم یادگاریەكی پەتی بە دیوارێكی هەڵواسراوەوە.
ناوجەرگەی تابلۆكە رێرەوێكی تەنگەبەرە هاوشانی دیوارێكی بەساڵاچوو تا دەرگایەكی دوو باڵی بەدیزاینێكی دێرین رادەكشێت، كات ئێوارەیەو نیشانەكانی چالاكی بە نیگای منداڵەكانەوە دیارەو هەر یەكەیان رۆڵی خۆی هەیە لە بەردەوامبوونی یارییەكە. ئەم تابلۆیە گوزارشت لە گەڕەكێكی پەراوێزخراوی لە كاروانی شارستانییەت بەجێماو دەكات بەو بەڵگەیەی ئاوەرۆی نییەو بەردەركی ماڵەكە نقومی چڵكاوی ئاوەڕۆ بووە. دیوارەكان لە هەندێك شوێنەوە لێك داترازون و وەك جلی پینەكراوی نەدارێك دەركەتوون و جلوبەرگی منداڵەكانیش نیشانەیەكی زەقی بێنازی و پەراوێزخراوین لەو شوێنەدا، بەڵام بەو یارییە دلخۆشن و بە چالاكی و زەوقەوە ئەنجامی دەدەن.
رەنگ لە تابلۆی چاوشاركێی هونەرمەند یاسین حەسەندا بە زۆری تێكەڵەیەكە لە دوو رەنگی زەقی رەش و سپی كە رۆشنایی و سێبەریان لە بەردەم هەتاوێكی بەتیندا لێك جیاكردۆتەوە. رەنگەكانی تر دەڕاوننە جلوبەرگی منداڵەكان و یەكێكیان پێ خاوسە ئەمەش نیشانەیەكی تری پەراوێزخستنی مناڵی كوردە لە رووی پەروەردەی سیستماتیكی و سایكۆلۆجی خێزانییەوەو هونەرمەند پێمان دەڵێت ئەی باوكان و دایكانی كورد مناڵ كەمبخەنەوەو زۆرتر بایەخ بە پەروەردەكردنیان بدەن، بەمەش لە پشتی تابلۆكانی هونەرمەندەوە گەڕانەوەیەكی نوستالیژی زەق هەیە بەرەو منداڵی، ئەو دەمەی هێشتا لە قۆناغی پاكنوودیدان و لە نیشانە زەقەكانی ئیرەیی و ركابەری و پاشقول لێكدان نازانن و زۆر سەرمەستانە خەریكی یارین، بەڵام لە رواڵەتدا شتێكەو لە ناوەڕۆكدا دەمانباتە سەر شتێكی ترو پێمان دەڵێت ژیان لەو شوێنەدا زۆر سادەیەو هێشتا نەگەیشتۆتە سەر ستایلی ژیانی سەردەمیانە. ستایلی جلوبەرگ و بڕینی قژی كوڕەكان زۆر لە هی سەردەمی ئێستا كۆنترەو دەگەڕێتەوە بۆ ساڵانی حەفتاكان، سێبەر قەبارەی زیاتری پێدراوەو رووبەری هاوبەشی لەگەڵ بەشەكانی تر بە زەقی بڕیوە هەر بە رەنگی سێبەر كە تێكەڵەیەكە لە رەش و سپی زیاتر دیدی بینەر لە هەر گۆشەنیگایەكەوە بێت داگیری كردووە.
ئەم تابلۆیە لە رێگەی یارییەكی منداڵانەوە دەتوانێت زۆرترینی نیگكانی مرۆڤ بەلای بیرەوەریەكانەوە رابكێشێت و بیاتەوە داوێنی منداڵی و هەر بینەرێك جیهانی جوانی خۆی تێدا دەبینێتەوەو ئەوەی لەبەردەمی ئەم تابلۆیەدا بوەستێت بێگومان شتێك لە رابردوو بە هەموو تاڵی و شیرینییەكانیەوە دەیباتەوە ئامێزی منداڵی و دوای راچڵەكینێك بە خۆی دەڵێت چسەردەمێكی خۆشبوو؟! لەكاتێكدا هەموو سەردەمەكان هەر هەمان بابەتن ئەوانەی گۆڕانكاری لەویژدانی ئێمە دەكەن مرۆڤەكانن نەك سەردەمەكان.
تابلۆی چاوشاركێ لە روانگەی دەروونیەوە دەكرێتە دوو بەشەوە، یەكەم: راوەستان و تێرامان لەبەر بیرەوەرییەك كە دەماباتە نا جیهانی منداڵی و خەیاڵە جادوو ئامێزەكانی سەردەمێك وەك تاك تیایدا ژیانمان كردو گوزەشت، دووەم بیركردنەوەیە لەوەی چۆن ئەو سەردەمە لەناو بەسەرچوونەكانی رۆژگاردا پێچرایەوەو بەسەرچوو، ئیتر جارێك تر هەیهات و هەیهات ناگەڕێتەوەو لەگەڵ زۆربەی شتەكانی تر پێچرایەوەو بوو بە رابردوو، دیزانی ماڵەكانمان، شتەجوانەكانی وەك تەلەفزیۆنی رەشوسپی و دەستارو كوپەڵەی ئاوو گۆزەو هتد.. ئەمانە كەرەستەكانی سەردەمی چاوشاركێ بوون، گەنم بردنە ئاسیاو و برژاندنی كولیچە لە فڕنەكانی بازاڕ و هتد..
تابلۆی چاوشاركێ باس لە یارییەكی منداڵانە دەكات، بەڵام لە جیهانێكدا ئێستا هەرچەندە بۆی بگەڕێین نایدۆزینەوە مەگەر لە بیرەوەریە بەسەرچووەكانی خۆماندا نەبێت و هیچی تر.

‌ 166 جار بینراوه‌
7/15/2017 4:43:19 PM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved