»  پەڕەموچ
رۆمانی ( زەماوەندی دڕندانە) پەیامێكی هۆشداری لەمەڕ سوپا
ئا/پەڕەمووچ


لە هەر كوێیەك سوپا هەبوو لەوێ‌ كارەسات هەیە
یەن كیفلیك ــ رۆمانی “ زەماوەندی دڕندانە”

ئەگەر بە قوڵاییەكانی مێژوودا بچینەوە دەبینین چیرۆكی زۆر سەیری ئەنجامدانی تاوانەكان هەیە بە ناوی شەڕو كوشتارو پاراستنی نیشتمان یان بیروباوەڕێكەوە ئەنجامدراوە كە خۆی لە خۆیدا پەیوەندی نە بە خۆشەویستی نیشتمان و نە بە پاراستنی بیروباوەڕو نە پیرۆزییەكانەوە نییە، لەو رێرەوە زەمەنیەوە شتی تازەمان بۆ دەردەكەوێ كە زیاتر بیرمان فراوان دەكاتەوەو ئارەزووی زانین و لێكۆڵینەوەی زیاتر دەكەین بۆ تێگەیشتن لە رەهەندە كۆمەڵایەتی و مرۆییەكان.
رۆمانی “زەماوەندی دڕندانە” یەكێكە لەو بەرهەمە ئەدەبیە گەورانەی كە جگە لە لایەنەكانی فانتازیاو داهێنانی ئەدەبی لێوانلێوە لە زانستی بوونەوەری مرۆیی كە دواجار پێمان دەڵێت گەر مرۆڤ لەسەرووی یاساوە بێت بمانەوێت و نەمانەوێت لە دڕندە خوارتر نابێت، نووسەر توانیویەتی زۆر بە ئەمەكانە خوێنەر بەو بابەتە نامۆوە ببەستێت كە گوزارشت لە نهێنییەكانی رەفتاری مرۆیی دەكات و زۆر بە وردی مامەڵە لەگەڵ كاراكتەرە یەك لە دوای یەكەكان دەكات، كە لە بەندێكەوە بۆ بەندێكی تر بە هەڵبەزو دابەزو دەركەوتن و ونبوون خوێنەر تووشی تاوگیری دەكەن، بەر لە ماوەیەك ئەگەرچی پێش ئەوەش بە ماوەیەكی زۆر دوورو درێژ ئەو رۆمانەم كڕیبوو، بەڵام خوێندنەوەی ئەو رۆمانە كەوتە ئەم دواییەو بەر لەماوەیەك ئەو رۆمانە سەیرو سەمەرەیەم خوێندەوە، كە بە ناونیشانی (زەماوەندی دڕندانە) لە نووسینی نووسەری فەرەنسی یان كیفلیك بووەو خەڵاتی گۆنكۆری ئەدەبی چنیوەتەوەو نازناوی (فۆكنەری فەرەنسی) بە رۆماننووسەكە دراوە.
لەم رۆمانەدا گرتەیەكی زۆر قێزەونی سادی هەیە گوزارشت لە سێ سەربازی ئەمریكی دەكات دەستدرێژی سێكسی دەكەنە سەر كچێكی هەرزەكارەی تەمەن سیازدە ساڵە لە بنكەیەكی سەبای چۆڵ و هۆڵ كە ئەمریكییەكان لەسەر داوای فەرەنسیەكان جێیان هێشتبوو، نیكۆڵی كچە فەرەنسی زۆرجوان و ناسك و پاكنوود بووە، لەبەر دڵسافی خۆی فریودەخوات و تووشی ئاریشەیەكی گەورە دەبێت.
ویڵ سەربازێكی ئەمریكی لەگەرمەی تەمەنی گەنجیدا بووە، مرۆڤێكی بێهوودەو بەدرەوشت بووە، هەمووكاتێك خۆی وەك فریشتە پیشان داوە، بەڵام لەگەڵ یەكەم دەسكەوتنی هەلی خوازراودا رۆحە شەڕانگێزەكەی دەردەكەوێت و دەبێتە دڕندەیەكی ترسناك، لە دیدارێكدا لەگەڵ نیكۆڵ لەناوشاردا خۆشەویشتی خۆی بۆ دەردەبڕێت و پێی رادەگەیەنێت كە ماوەی جێهێشتنی فەرەنسای زۆر كورتەو دواتر دێت و هاوسەرگیری لەگەڵ ئەنجامدەدات و پێكەوە دەچنە ئەمریكا، دواتر شێرو رێوی بۆ دەهێنێتەوە بۆئەوەی بانگهێشتی ئاهەنگێكی گەورەی بكات لەو بنكە سەربازییەی كە بە بۆنەی گەڕانەوە بۆ نیشتمان سازی دەدەن و دواجار دەیباتە ناو قەڵایەكی چۆڵ و هۆڵ و بێدەنگ و كشومات كە نەئاهەنگی تێدا سازدەدرێت و تەنانەت هیچ لە سەربازەكانی تێدا نەماوە، ئەو كچە هەرزەكارە باوەڕی بێدەكات و لەگەڵی دەچێتە ئاهەنگە وەهمیەكەی ناو سەرببازگە كەلاوەكە.
یان كیفلیك لێرەدا باس لە گرتەیەكی سادیزمی سەربازەكان دەكات لەكاتی ئاشتیداو هیچ جۆرە جەنگێك لەنێوان ئەو دوو وڵاتەدا نەبووە، بەڵكو بە پێچەوانەوە دوو وڵاتی هاوپەیمانبوونەو چارەنووسی سیاسییان پێكەوە گرێداوە، بەڵام سەرباز چونكە لەسەر بنەمای توندوتیژی پەروەردەكراوە هەر ئەو رۆحی شەرانگێزییەی بە پێی هەل ومەرجەكان دەردەكەون كە هیچ جۆرە بەزەییەك لەو رواڵەتە دەرناخەن، ویڵ هەر كە دەگەنە شوێنی مەبەست كاسێتێكی خەمناك دەخاتە ناو تۆماركەرەكەو گوێ لە موزیكێكی دڵتەزێن دەگرن، زۆر بە دڕندەییدەڕانێتە جەستەی نیكۆڵی هەرزەكار و هەردووكیان پێكەوە ئارەزوو دەكەن یەكتری لە ئامێز بگرن، ویڵ فیكەیەكی بێ تام دەردەداو پێی دەڵێت : “دانیشە ئازیزم.. هیچ نیگەران مەبە”. نیكۆڵی حەپەساو نازانێت چۆن لەسەر ئەو سنووقی جبەخانەیەی پڕە لەتەقەمەنی چۆن دابنیشێت و دەترسێت نەبادە جلەكانی تووشی پیسی و چرچی بن و ئینجا پێی دەڵێت خۆشەویستە بچوكەكەم بڕۆ لەسەر نوێنەكە دابنیشە.. ئەوێ‌ باشترین و خۆشترین شوێنە بۆ ئەوەی دابنیشیت.. ئایا هەست بەتینوێتی ناكەست ئەویش بە ترسێكەوە پێی دەڵێت: “ویل باشترە ئیتر نەخۆیتەوە”
ـ نەخێر نیكۆڵ.. دەخۆمەوەو دەبێ تۆش لەم خواردنەوەیەدا هاوبەشم بیت!!
قاقایەكی نامەردانە دەكات و ئینجا بە توندی لە ئامێزی دەگرێت و پڕ بەدەمی خۆی تفێك هەڵدەداتە سەر روخساری نیكۆڵی داماو و ئینجا بە شێوازێی ناشرین فەرمانی پێ دەكات و دەڵێت دەبێ بخۆیتەوە..توندە لەملی دەگرێت و دەمی شوشەكە لە دەمی نزیك دەكاتەوەو ئەویش بە ترس و نیگەرانییەوە بەرگری لەخۆی دەكات و لە ئاكامدا بڕێك لە خواردنەوەكە دەرژێتە سەر جلەكانی، نیكۆڵ تاو بۆدەرگاكە دەبات و دەزریكێنێت، بەڵام بەر لەوەی دەستی بگاتە دەسكی دەرگاكە ویل لە قژی رایدەكێشێت و توند بەسەر نوێنەكەیداددەات، بەهەموو دەنگێكی دەقیژێنێت و ئەویش دوای پێكەنینێكی سارد شەقازلەیەك بە روومەتی دەكێشێت و پێی دەڵێت دەمت ناكەیتەوە گەر بۆ خواردنەوە نەبێت، ئینجا هەموو شوشەی وێسكییەكە بەتاڵ دەكاتەوە بەسەریاو سەرتاباڵای لە وێسكی شەڵال دەكات، ئەویش دەخنكێت و هەوڵدەدات بە نوخانەكانی چنگی لێ بگرێت بەڵام هەوڵەكانی ناكام دەبن، ویڵ پێی دەڵێت سەركێشی و كەللەرەقی بەسە!! ئەمشەو میوانی منی و....ئینجا قژی رادەێشێت و چەند تەڵێك لە قژی دەكاتەوەو لەنێوان پەنجەكانی دەیسووتێنێتئەویش بە دوچاوی قولەوە دەڕوانێتە تەڵە قژە خاوەانی چۆن لەناو پەنجەكانیدا دەسووتێن. روانین بۆچاوەكانی قوربانییەكە دەبێتە هاوشێوەی تیرێك و جەرگی دەبڕێت، چەند تەڵێكی تر لە قژی دەكاتەوەو بەهەمانشێوە لەنێو پەنجەكانیدا دەیسوتێنێت و هەوڵدەدات خۆی دەرباز بكات بەڵام ویڵ بەپێی پاشقولێكی لێدەداو بەردەبێتەوە، ئینجا خۆی دەدات بەسەریاو پێی دەڵێت دەبێت بخۆیتەوە و ئەویش تاقە شتێك كە لە بەردەمیدا دەمێنێتەوە تكاو پاڕانەوە دەبێت بەوەی كەنا ناكرێت بەو شێوەیە مامەڵەی دڕندانەی لەگەڵ بكات، كەچی ئەو بێ گوێدانە ئەوەی لێوەكانی بە شوشەكە بریندار دەبن هەر وێسكییەكەی دەرخواردەدەات و لە ئاست ئەو هەموو فرمێسك و هەنسك و كرووزانەوەو پاڕانەوەیە گوێیەكانی دادەخات. ئینجا رایدەكێشێت و بە توندی دەیخاتە سەر نوێنەكەو پێی دەلێت ئەی فەرەنیسە بچكۆڵانەكەم، وێل دەچێتە بەردەم دەرگاكەو هاوارێك بەتاریكیدا دەكات و دەلێت:” دەی.. گەنجەكان لە كوێن؟!” هەر لەگەڵ هاوارەكەیدا دوو گەنجی تر پەیدا دەبن بە ناوەكانی (ئەلیدۆ)و (سام)، كە دوو سەربازن لەگەڵ ویل بۆ چاودێریكردنی دوایین كەرەستەكانی سەربازگەكە ماونەتەوە، لێرەوە ئیتر كارەساتەكان دەست پێدەكەن، ویل كەڵەشێرێك دەهێنێت لەبان سەر نیكۆڵ وەك شەڕیچكی دەروونی دەیخنكێنێت و دواتر هێلكەیەك بەسەر سنگی قوربانییەكەدا دەشكێنێت و دادەنیشن و پێكەوەهێلكەی سوورەوەكراو دەخۆن.
كە دەمەو بەیانی خۆر هەڵدێت لەناو ئەو سەبازگە گەورەیەدا ەس نابینرێت و هەرسێ جەڵادەكە ون دەبن و ئەوەی ماوەتەوە بەتەنها قوربانییەكەیەكە گلەیی لە بەختی خۆی دەكات و نەفرەت لە پاكەكەی دەكات چەند بە سادەیی بە خۆشەویستی مرۆڤێكی دوورە وڵات و نامۆ خۆی تووشی ئەم فریوە كوشندەیە كرد. لەوێ بۆنی خواردنی بۆگەن مرۆڤ دەخنكێنێت دەریا مەنگ و هێمن و بە ئاستەم با رووبەرەكەی دەلەرێنێتەوە، بەڵام نیكۆل هێشتا تاكە پێڵاەو رەشەكەی پاراستووەو بەدوای دووەمداد ەگەڕێت بۆئەوەی بیگەڕێنێتەوە بۆ ناو كەرەستەكانی دایكی كە بە دزییەوە بردبووی بۆ ئەوەی شتێك بەتەمەن گەورەتر دیاربێت، لەناكاو سام پەیدا دەبێت و هەندێك دەستبازی نارەحەتانەی لەگەڵ دەكات و پێی دەڵێت ئەوە خوێنە.. وەك ئەوەی خوێنی دەستدرێژیكردنیان بۆ سەر جەستەی دەسكەوتێك یان خەڵاتێكی زێرین بێت، ئینجا بەشێوازی هیندیە سورەكلن لە روومەتی خۆی دەدات و چەند هێڵێك بەدەم پێكەنینێكی ناجۆرەوە جێ دەهێڵێت، لەوێوە شیوێكی بەرفراوان لە جیاوازی دەكەوێتە نێوان كچە هەرزەكارێكی لێوانلێو لە خەون بە خۆشەویستی و سەربازێكی دڕندە كە بەوە پەروەرد كراوە هیچ كات قوربانییەكەی بەڵاوە مرۆڤ نەبێت و چۆنی بوێت ئازاری رۆحی بدات، لەناكاو ویل دەست دەبات و جانتاكەی لێ دەرفێنێت و بۆپاڕە دەگەڕێت.
رۆمانی زەماوەندی دڕندانەهەر بەوە كۆتایی نایەت كە لە ماوەی شەوێكدا ئەو قوربانییە لە كچێنی دەخەن و دواتر رووداوەكە فەرامۆش بكرێت، بەڵكو نووسەر بە دوای دەرهاویشتەكانی ئەو رووداوەدا دەگەڕێت و رهەموو دەردە سەرییەكان لە دوای ئەو ساتەوەختەوە دەست پێدەكەن، هەموو رووداوەكان پێكەوە لەسەر روودانیتاوانەكە پێكەوە گریدەدرێن و دەگەنە كۆتاییەكی جەرگبڕی دڵتەزێن، گەورەترین روودوەكان لە كلیلەكەوە دەست پێدەكەن كە رێرەوی كەسانی دەوروبەری قوربانییەكە لەو نەهامەتییە دیاری دەكەن، رووداوەكان روەردەچەرخێنە جۆرێك لە كڵۆڵی و نائومێدی ئیتر تاوگیرییەكان و كاردانەوەكان رێرەوی رۆمانەكە دیاری دەكەن نەك رووداوەكان بە تایبەت ئەستووربوونی رقی خوێنەر بەرانبەر بەهەموو دەزگایەكی سو چەكداری جا چ لە جەنگدا بێت یان لە ئاشتی و چ لە رووبەرووبوونەوەدا بێت یان لە هاوپەیمانێتی سەرباز هەر ئەو مرۆڤە بە دڕندە كراوەیە كە دواجار بە هیچ شتێك داناسەكنێتو تا مردن دەبێتەدیلی ئەو پڵنگە هارەی لە ناخیدا دەژیت و دەیكاتە قوربانی ئارەزووە ناشرینەكان و لە رووكەشدا وەك جەلاد دەردەكەوێت.
لەماجەرای دوای شەوی زەماوەندی دڕنداوە نووسەر نەفرەتێكی گەورە دەخاتە سەر ژیانی نیكۆڵی قوربانی و هەموو رۆژگارەكانی تا ئاستی مردن و لەناوچوون تاڵ دەكات، باوك و دایكی ئەو دوو پیرەی دەیانەوێت هاوسەرگیری پێبكەن و لەو نالەبارییە رزگاری بكەن كە بەهۆی نەخۆشی دەروونییەوە تێی كەوتووە، پووری هەوڵدەدات كۆرپەڵەكەی ناو سكی لەبار بەرێت كە نازانرێت لە سێسەربازی ئەمریكی نادیار لە كامیانی هەڵگرتووە، دواجار لۆدۆی كوڕیدێتە دونیاو لە ناو یقسەو تەشەری كۆمەڵگەی دەوروبەریدا تووشی نەخۆشی دەروونی دێت و دەكەوێتە شێتخانەكان و نیكۆل بەم هەموو دەردەوە دەناڵێنێت.
نووسەر لەم رۆمانەدا زۆر جەخت لەو نەخۆشییە دەروونیانە دەكاتەوە كە سەردەمەكە مرۆڤەكانی بەهۆیەوە تووشبوە، دایكێك رقی لەمنداڵەكەی دەبێتەوە چونكە خۆشی نازانێت چۆن ئەو منداڵەی بووەو هیچ چێژێكی لەو سێكسە نەبینیوە كە لێوانلێو بووە لە ئەشكەنجەدانی جەستەیی و دەروونی و رۆحی، بۆیەهەر لە سەلرەتاوە هەوڵددەات لەناوی بدات و بە كۆرقەڵەیی ‌ولەباری بەرێت و بەو هۆیەوەئەو منداڵە بە كۆمەڵێك ناتەواوی و زگماییەوە دێتەدونیاو دواجار دەكەوێتە نەخۆشخانەی دەروونی.
ئەوەی نووسەر بۆ خوێنەری جێ دەهێلێت لەم رۆرمانەدا تەنهاو تەنها خۆشەویستی دایكە بۆمنداڵەكەی.. بەڵام كام خۆشەویستی؟ خۆشەویستییەكی غەریزیانەی بێ بنەمای لێك هەڵوەشاوەو هەپروون بە هەپروونی پڕ لە رق و كینە بەرامبەر ئەو باوكەی كە بەجێی دەهێلێتو هەموو سۆزێكی لێ زەوت دەكات و لەبەرامبەردا پڕی دەكات لە رق و كینە بەرامبەر بە نێرینە! ئەو سەربازە تاوانەكەی بێ هوودانە ئەنجامداو رۆیشت، بەڵام مۆتەكەی سادیزمی تا هەتایە لە رۆحی قوربانییەكەدا دەمێنێتەوەو هەورە رەشەكانی ئەو رووداوە لە جیاتی باران هەمیشە روخساریان پڕكردووە لە فرمێسكی قەتیسماوی بێ كۆتایی.
ئەوە نییە كۆتایی رۆمانەكە بە جۆرێك لە ئۆخژن یان سەركەوتن یان داداگایی كردنی تاوانبارەكان تەواو بێت بەڵكو كارەساتبارتین رووداو ئەوەبوو لە كۆتاییدا لۆدۆی نەۆش دوای ئەوەی نەخۆشخانەكە دەسوتێنێت ئینجا هەڵدێت و دەچێت لەناو پاشماوەیەكی كەشتییەك لە كەناری ئاوەكەدادەمێنێتەوەو دایكی دەگەڕێت بۆی و دەیدۆزێتەوە، لۆدۆ باوەش بەدایكی دەكات وئینجا توند دەست دەكاتە گەردنی و دەیخنكێنێت و پێكەوە هەڵیدەداتە ژێر رووبارەكەو هەردووكیان لەناو دەچن، بەمەش مەرگ دەبێتە بەهەشتی مرۆڤە نائومێدەكان.

‌ 67 جار بینراوه‌
7/15/2017 4:44:27 PM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved