»  پەڕەموچ
مـێرگ
 عەبدولسلام دەغمەش دوبەی


*  و: دڵشاد شەفیق

دوای بەرزكردنەوەی چەندین داواكاری و پێداگری بۆ ماوەی ساڵانێك، دواجار شارەوانی رەزامەندی دەڕبری بەرامبەر بە خەڵكی گوندی “سەروە” تا ستوونی كارەبایی لەسەر هەردوولای رێگەی گوندەكەیان دابنێن و دەروازەی گوندەكەیان بە شەوان رۆشن بكاتەوە.
هەر ئەو رۆژە ئەبو ئەحمەدی موختاری گوندەكە دەسبەجێ خۆی گەیاندە پایتەخت و هەموو كارەكانی راییكرد و بە دڵخۆشییەكەوە لە نووسینگەی سەرەكی شارەوانی گەڕایەوەو بەدەستێكی نووسراوەكەی كە بەرێوەبەری شارەوانی لە خواریەوە مۆری كردبوو كە هەر بە شێوەی خۆی دەچوو بەرزی كردەوەو لە دوورەوە پیشانی خەڵكی گوندەكەی دەدا، ئیتر پیاوماقوڵان و ریش سپییەكانی گوندەكەش گۆلگێكی ناسكیان بەتاو پەلكێشكردو بەو بۆنەیەوە كردیان بە قوربانی.
پلانی ئەبو ئەحمەد و هاوكات خەڵكی گوندەكەش دەیانویست لەنێوان هەردوو ستوونی دەرەوازی گوندەكە لافیتەیەكی پێشوازی بنووسن بۆ ئەو میوانانەی دێنە گوندەكەیان كە چەندین شوێنەواری میژوویی تێدایەو شایەتی دەدات بە تەمەنی ئەم گوندەی چەندین سەدەی لە مێژوو تێپەڕاندووە وەك خۆی ماوەتەوە.
ــ دوای هەفتەیەك لە ئەمڕۆوە چاوەڕوان بن و تا هەفتەیەك و دواتر لیژنەیەك لە شارەوانی دێن و پشكنین بۆ دانانی ستوونەكان دەكەن و رێگەكە رۆشن دەكەنەوە، پێم وتن من بە خۆم و هەر سێ كوڕەكەم چاڵەكان هەڵدەكەنین بۆ ئەوەی كاتی زۆرترمان هەبێت و خێرا كاركان تەواوبن، بۆ ئەوەی دواتر هەردوو ستوونەكە دابمەزرێنین، موختاری گوندەكە بەمشێوەیەو بەحەماسەتی جارانی لەگەڵ پیاوماقوڵ و ریشسپیەكان گوندەكە دەدواو ئەوانیش رۆحی هەماهەنگی و هاوكاری خۆیان و مناڵەكانیان بۆ دەربڕی، بەڵام ئەو هەموو پێشنیارەكانی رەتكردەوە.
دوای هەفتەیەك لیژنەی شارەوانی ئامادەبوون و موختاری گوندەكەو هەرسێ كوڕەكەی و هەموو ریشسپی و پاوماقووڵانی گوندەكە ئامادەبوون و چوار پیاوی كەڵەكەت یەك لەدوای یەك لە ئۆتۆمبیلێكی گرانبەهای جام رەشەوە دابەزین. پیاوێكی گۆشتن كە چاویلكەیەكی جوانی رەشی لەچاودابوو، بەدەستی چەپی قەرەوێتەكەی گرتبوو با یاری پێ نەكات و لەنێوان پەنجەكانیەوە ئەنگوستیلەیەكی پانی ئەستوری زێڕین بریقەی دەدایەوە، تەوقەی لەگەڵدا كردن و خۆی بە خەڵكی گوندەكە ناساند.. خوا تەمەن درێژتان بكات من بەرێوەبەری شارەوانیم، دواتر هەر سێ پیاوەكەی تر یەك لەدوای یەك تەوقەیان لەگەڵ دەكردن و دەیانوت:
 ــ خوا تەمەن درێژتان بكات من بەرپرسی بەشی سەلامەتی گشتیم.
ــ خوا تەمەن درێژتان بكات من بەرپرسی بەشی كوالێتیم.
ــ خوا تەمەن درێژتان بكات من بەرپرسی بەشی دارایی ژمێریاریم.
موختارو پیاوماقوڵانی گوندەكە بە سادەیی و شكۆمەندی ئاسایی خۆیان پێشوازییان لێكردن لە كاتێكدا هیچ شتێكیان سەبارەت بەو پلەو پۆستانەیان نەدەزانی كە ئەوان بۆیان باسكردن. ئینجا كوڕەكانی بانگ كرد و پاچ و خاكەنازەكانیان بەرزكردەوە كە لەبەردەم رۆشنایی خۆرەتاوەكە دەبریسكانەوەو دەستیانكرد بە هەڵكەندنی چاڵەكان و بەو هۆیەی تۆزو خۆڵ بەدەم باوە هەڵسا بەرپرسەكان خۆیان دوورخستەوە، كاتێكی زۆری نەبردو چاَلەكان كۆتاییان پێ هات و موختارەكە لەبەر ماندووبوون ئارەقەی ناوچەوانی سڕییەوەو بە هەنسكە هەنسك لە ئەندامانی لیژنەكە نزیكبووەوە و وتی: ئەوەتا بەرێزان لە هەڵكەندنی چاڵەكان بووینەوە، ئەوەی ماوەتەوە دانانی ستوونەكانە بە هاوكاری خەڵكی گوندەكە كە زۆر چاوەڕوانمان كرد.. ئێستاش لەبەر بەدەنگەوە هاتنتان زۆر سواپگوزارتانین!
هەر لەگەڵ لە وتەكانی بووەوەو بەرپرسی سەلامەتی گشتی پەنجەی دۆشاومژەی بەرزكردەوەو وتی: نابێ ئەم چاڵانە هەر وا بەبەتاڵی جێ بهێڵین، بەڵكو دەبێ چواردەورەی بگرین بۆ ئەوەی منداڵ و ماڵات كە تێپەر بوون بێرەدا نەكەونە ناو چاڵەكان و ئازاریان پێنەگات.
بەرپرسی كوالێتی وتی: بەر لەوەی دیوارەكان بكرێن دەبێت بزانین بەكام دیزاین دەكرێت و تا چەند لەگەڵ پرۆژەكە گونجاوە.
بەرپرسی دارایی و ژمێریاری وتی: تا ئێستا بودجەمان بۆ نەهاتوە تا پارەی ئەو دیوارانە خەرج بكەین....
ئینجا بەرێوەبەری شارەوانی دوو هەنگاو هاتە پێش و بەدەستێكی قەرەوێتەكەی گرتبوو، بریسكەی ئەنگوستیلە ئاڵتوونیەكەی لەناو چاویلكە رەشەكەی دەبینراو وەك ئەوەی پەندێكی فەلسەفی گەورەی پێ بێت وتی: دەبێ بۆ ئەو مەبەستە كۆبوونەوەیەك ئەنجامبدەین و راپۆرتێك ئامادەبكەین تا لە كۆبوونەوەی گشتی رادەستی سەرۆكی گشتی لیژنەكانی بكەین و رەزامەندی لەسەر وەرگرین.
موختارو كوڕەكانی هێشتا ئارەقەیان بە تەواوەتی وشك نەبووەوە خۆڵ و گەردی كاركردنیش تەواوی سیمایانی گۆڕیبوو، گوێیان لەو گوزارشتە سەیرانەی جەنابی بەرێوەبەر دەگرت، ئەوەندەی پێ نەچوو موختار بە ئاماژەیەك كوڕەكانی راستكردەوەو دەستیانكرد بە پڕكردنەوەی چاڵەكەو دیسانەوە تەپوتۆزی كاركردن بەرپرسەكانی بێزاركرد تا چاڵەكە تەواو لەگەڵ تەختایی زەوی یەكسان نەبوو دەستیان لێ هەڵنەگرت.
هەر هەموو پاچ و خاكەنازەكانیان دایەوە شان و پشتیان لە بەرپرسەكان كردو خەڵكی گوندەكەش بەدوایانەوە دەكشان و دەیانوت خوا تەمەنتان درێژ بكات، خوا تەمەنتا...

‌ 68 جار بینراوه‌
7/15/2017 4:49:21 PM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved