»  باران
ژنان هەمیشە قوربانی روداو و كارەساتەكانن
ئا / هاوار ستار

بەهۆی روداوەكانی ئەم دواییەی شاری كەركوك و دووز خورماتوو بەتایبەتی جارێكی تر كورد ئاوارەیی بینییەوە و لەم نێوەندەش ژنان بە پلەی یەك بوونەوە قوربانی روداو و كارەساتەكان، ژنان هەر لە سەرەتایی مرۆڤایەتییەوە قوربانی و زەرەرمەند بوون و بەهۆی جەنگەكانی پیاوەوە بونەتە پاشماوە، كاریگەرییەكانی جەنگ بەسەر ژنەوە بۆ چەندین ساڵ ماوەتەوە و لە كاتێكدا پیاویان كوژراوە یاخود كور یا برا و باوك ئیتر ئەوان توشی دەیان كێشە بوون و زۆبەشیان بە تەنهایی تەمەنیان بەڕێكردووە، رووداوەكانی ئەم دواییەش دەریدەخەن جارێكی تر ژنی كورد قوربانییە.


نەرمین عەزیز ژنێكی تەمەن 37 ساڵەی خەڵكی خورماتوە بۆ (هەواڵ) وتی: “لەسەرەتای تەمەنمەوە ئەنفال چی پێ نەكردین ؟ ، تەمەنم 8 ساڵ بوو ئەنفال و راكەڕاكم بینی و قوربانیمان دا دواتر راكردن بۆ ئێران و كۆڕە و پاشان شەڕی ناوخۆ و ئاوارەیی و پاشان شەڕی داعش و ئێستاش دیسانەوە بە هۆی هێزی عێراقیەوە ئاوارەیی”.
هەروەها نەرمین وتی: “برایەكم پێشمەرگەیە و واجبات دەگرێ ئێستاش هەر چاوەڕێی ئەو برایەم دەكەین شەوان بێتەوە لامان، دایكم توشی نەخۆشی خەمۆكی بووە و باوكیشم پیر بووە و پشتی چەماوە”.
ئەو خانمە باسی لەوەكرد: “دەڵێن خۆتان رۆشتن بۆ ناگەڕێنەوە، چی بگەڕێینەوە كاتێك ئێمە لەترسی شەڕ و دەست درێژی چووین ئێستاش ئەو ترسەمان تێدایە”.
نەجیبە تۆفیق تەمەن 43 ساڵە دایكی یەك منداڵ بۆ هەواڵ وتی: “هاوسەرەكەم لەشەڕی ناوخۆ لەدەستداوە و ئاوارەبووین، یەك كوڕی لە پاش بەجێما و بە هەزار رێگە و ئیشكردن بە خێوم كرد و گەورەم كرد، پاش پرۆسە گەڕاینەوە بۆ كەركوك ئەوە دیسانەوە ئاوارەیان كردین”،باسی لەوەشكرد : “ئەو كوڕەم بووە هەموو ژیانم و وام لێهات بەردەوام خەریكی كار بۆ گەورە كردنی و ئێستا كاسبكارە و خاوەن خێزانە و بەهۆی ئەو رووداوانەی كەركوكەوە پێكەوە دەرچوین بۆ سلێمانی”
بە خەمەوە وتیشی: “لە پاش هاتنی تیرۆرستانی داعشەوە ئیتر كوڕەكەم هات و وتی: دایە ئەمەوێت ببم بە پێشمەرگە منیش نەمتوانی رێگری بكەم و ئێستا ئەو پێشمەرگەیە و بەپەرۆشە بۆ گەڕانەوە بۆ سنورەكان”.
دەربارەی قوربانیدان و بە قوربانیبوونی ژنان رەنگین نوری عەزیز رێنمایكاری دەرونی بۆ (هەواڵ) رایگەیاند: “زەبری دەروونی پاش جەنگ ئاسەوار و زیان و مەترسیەكانی مایەی نائارامی و شڵەژانی زیاترن لای ژنان”،
روونیكردەوە: “ئەگەر چی ژنان پشتیوان و هاندەر و ورە پێدەری  پیاوان بوون لەبارودوخە سەختەكاندا ، بەڵام بە مردنی باوك و براو هاوسەر و كوڕەكانیان ژنان ئەركیان زیاتر دەكەوێتە ئەستۆ”.
هەروەها وتی: “ژنان بێبەش دەبن لەو خواستە ژنانەی كە بەسروشتی خۆیان هەیانە كە لەلایەن رەگەزی بەرامبەرەوە چاودێری و پارێزگاری لێبكرێت و نازی هەڵبگیرێت خۆشەویستی پێ بدرێت”،
ئەو رێنمایكارە دەرونییە باسی لەوەشكرد: “جگە لە خواست و باسی كۆمەڵگا، بەدەر لەوە  ئاوارەبوون و جێگۆڕكێ و نائارامی و ناسەلامەتی دەبێتە هۆی زیادبوونی ترس و تۆقین شڵەژان لە كۆتایی هەر پشێویەك هەڵچوونەكان زیاددەكەن و ئاسایشی شوێنی نیشتە جێبوون كەم دەبێتەوە”
رەنگین نوری ئاماژەی بۆ ئەوەشكرد: “ئاوارەیی بۆ تاك و بەتایبەت ژن لە روبەڕووبوونەوەی كەسانی نامۆ ئەگەری بەزاندنی سنوری جەستەیی و توندوتیژی لێدەكەوێتەوە  كە دەبێتە هۆی دروستبوونی زەبری دەروونی لای ژنان، لەگەڕانەوەش هەمان مەترسی لە هێزی نامۆ دەكەن”.
هەروەها ئەو رێنمایكارە وتی: “پێویستە سەلامەتی بۆ تاك بگەڕێنینەوە و هاوكاری بكرێن، چونكە سەلامەتی و ئارامی تاك یەكێكە لە پێداویستیە  سەرەتایی وسەرەكیەكانی ژیان”.

‌ 444 جار بینراوه‌
10/28/2017 9:11:20 AM
Print Friendly and PDF
بابەتی زیاتر ...
هۆشیار مەلا عەبدولڕەحمان
پارێزەر: لوقمان مستەفا ساڵح
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved