»  باران
70 % جیابوونەوەكان لەسەر داوای ژنان خۆیان بووە
ئا / هەواڵ


لە دوو ساڵی دواییدا ئامارەكان وادەردەخەن كە رێژەی تەڵاق لە عێراق لەئاستێكی زۆر بەرز تۆماركراون و 70% داواكاریەكانیش لەسەر داوای مێینەكان خۆیان بووە.

بەپێی ئامارێك كە لەراپۆرتێكی رۆژنامەی حەیاتی لەندەنی بڵاوكراوەتەوە لە ساڵی 2016دا رێژەی تەڵاقی فەرمی و تۆماركراو لە عێراقدا 53182 حاڵەت بووە، لەساڵی 2015 شدا، تەڵاق بەرێژەی 52465 حاڵەت تۆماركراوە، بەمەش دەردەكەوێت كە لەساڵی 2016دا رێژەی تەڵاق بەرزبووەتەوە و زیادی كردووە.
هەر بەپێی ئەو راپۆرتەی رۆژنامەی حەیاتی لەندەنی زۆربەی جیابوونەوەكانی عێراق لەتەمەنی گەنجێتیدان و هۆكارگەلێكی زۆر هەن بۆ ئەو جیابوونەوانە، هەروەها 70%ی جیابوونەوەكان لەسەرداواكاری مێینە خۆیان بووە.
بوونی ئەم ئامارانە لە كاتێكدایە لە عێراق هاوسەرگیری دەرەوەی دادگاش هەیە بە تایبەت هاوسەرگیری پێشوەختەو جیابوونەوەی زۆریشی لێكەوتوەتەوە، بەڵام بەهۆی نەبوونی بەڵگەنامەی فەرمی ئامارێكی روون نییە بۆ ئەو جیابوونەوانە.

شیرین ئەحمەد تەمەن 29 ساڵەو دایكی دوو منداڵ، كە لە ئێستادا لە هاوسەرەكەی جیابووەتەوە، بۆ (هەواڵ) وتی: “ ژیانێكی زۆر زەحمەت دەژیم و پێشموایە جیابوونەوە لە هاوسەرەكەم كارێكی هەڵەبووە”.
ئەو خانمە روونیكردەوە “هەرچەندە هاوسەرەكەم كەسێكی زۆر باش نەبوو، بەڵام منداڵەكانم بێ باوكی دەچێژن”.
رونیشیكردەوە “هەرچۆنێك بێت من بەو گەنجییە بێوەژن كەوتووم و بوومەتە جێگەی باس و خراپ تێڕوانینی خەڵكی”.
بەبۆچونی شیرین ئەحمەد “كێشەی تێكدانی نێوان دوو كەس دەوروبەریش رۆڵی بەرچاویان تێدا هەیە و وادەكەن بڕوا بە قسەكانیان بێنیت و هەر بە گەنجی ماڵ و حاڵی خۆت بشێوێنیت”.
هەروەها وتی: “كاتێكیش كە بێوەژن كەوتی و لەتەمەنی گەنجێتیدا بوویت ئینجا قسە و بوختانت بۆ هەڵدەبەستن”.
ئەو خانمە باسی لەوەشكرد “ئەگەرچی من خۆم داوای جیابوونەوەم كرد و بەپێی یاسا كەیسەكەم بردەوە، بەڵام لەروی دەروونی و كۆمەڵایەتییەوە ئاسودەنیم و نابم”.
ئاماژەی بەوەشدا “ناتوانم هاوسەرگیری دووەم بكەم و منداڵەكانم بدەمە دەست چارەنوسێكی نادیار، گریمان گەر كردیشم و خراپ دەرچبوو ئەوا ناتوانم جارێكیتر جیاببمەوە، چونكە دەڵێن ئیتر فێربووە تەڵاق بدرێت ئا ئەوەیە كێشەی كۆمەڵگە”.
یەكێكی تر لەو ژنانەی ئێستا بێ هاوسەرە دونیا ئەمینی تەمەن 20 ساڵە، بۆ (هەواڵ) وتی: “كە هاوسەرگیریم كرد تەمەنم تەنها 18 ساڵ بوو و پاشان دوای كەمتر لە ساڵێك لە هاوسەرەكەم جیابوومەوە”.
ئەو خانمە گەنجە وتیشی: “كە جیابوومەوە ئەو كات دوو گیان بووم، ئەوەی رویدا هەرگیز من بیرم لێنەكردبووەوە بەم تەمەنەوە كە تازە سەرەتای ژیانە من ببمە دایكێك كۆرپەكەی باوكی نەبینیبێت”.
هەروەها دونیا وتی: “ژیان بەمجۆرە زۆر سەختە، بەڵام ئیتر ئەوەش چارەنووسە كە دەبێت ئەو تەمەنەی پێمان دراوە بە خۆشی و ناخۆشییەكانییەوە بەڕێی بكەین”.
وتیشی: “ئەوەی بەسەر من و كەسانی وەكو مندا هاتووە كە دایكێكی تەمەن 20 ساڵی بێوەژن بوبێت یەكێكە لە تاقیكردنەوەكانی ژیان و بە خۆشی و ناخۆشییەوە ناچارین لەم وڵاتەدا بەڕێی بكەین”.
لای خۆیەوە كوردستان خالید لێپرسراوی بەشی كۆمەڵایەتی یەكێتی ژنانی كوردستان لقی كەركوك لەسەر زیادبوونی رێژەی جیابوونەوەكان و بێوەژن بوونی ژنانی گەنج، بۆ (هەواڵ) رایگەیاند: “دوو جۆرە بێوەژنی گەنج و منداڵمان هەیە كە هەردووكیان زیاتر بێوەژنبوونیان لە ئەستۆی بنەماڵەكانیانە ئیتر بە هەر هۆكارێك بێ هاوسەر بووبن، ئەوەش ئەوانەی بەحەزی خۆیان بێ گوێدان هاوسەرگیری دەكەن یان ئەوانەی بەزۆر دەدرێنە شو بەتایبەت ئەوانەی دەرەوەی دادگا و هاوسەرگیری پێشوەختە”.
لێپرسراوی بەشی كۆمەڵایەتی یەكێتی ژنانی كوردستان لقی كەركوك روونیكردەوە: “زۆربەی ئەوانەی تەڵاق دەدرێن یان داوای تەڵاق دەكەن بەرێژەیەكی بەرچاو گەنج و تەنانەت منداڵن”.
هەروەها باسی لەوەشكرد “زۆرجار ئەو ژنانە لەسەر شتی وا كێشە دروست دەكەن كە پێكەنیناوییە و ئەمەش واتای ئەوەیە بە ناكامڵی هاوسەرگیریان كردووە یا بە شودەدرێن و بە گەنجی بێوەژن دەبن”.
كوردستان خالید ئاماژەی بەوەشدا: “هەندێك لەوانەی هەر بە گەنجی جیابوونەتەوە، هەڵەی خێزانی تێدا بووە كە بەجۆرێك هەندێكیان پێش تەمەنی 18 ساڵی دراون بە شوو و ئێستا بێوەژن كەوتون”.
وتیشی: “كێشەی سەرەكی تەڵاقی ژنانی گەنج ئەوانەن كە زوو هاوسەرگیری دەكەن و دواتر زوو پەشیمان دەبنەوە و ناچار جیادەبنەوە”.

‌ 106 جار بینراوه‌
11/4/2017 9:36:19 AM
Print Friendly and PDF
بابەتی زیاتر ...
هۆشیار مەلا عەبدولڕەحمان
پارێزەر: لوقمان مستەفا ساڵح
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved