»  پەڕەموچ
ساڵی گەڵارێزانی كەڵەپیاوانی كوردە عەلی ئەشرەف دەروێشیان چووە خانەی نەمرانەوە




رۆژی پێنجشەممە 26ـی تشرینی یەكەمی رابردوو نووسەری گەورەی ئێرانی بە رەچەڵەك كورد عەلی ئەشرەف دەروێشیان لە تەمەنی (76) ساڵیدا كۆچی دوایی كرد، هۆكاری مردنەكەشی پەككەوتنی لەناكاوی سیەكانی بوو كە ماوەی پێنج ساڵ بەدەست ئازاری سیەكانیەوە دەیناڵاند، لەدوای مردنیەوە وەك كەڵەنووسەری كورتەچیرۆك میراسێكی ئەدەبی گەورەی بۆ مرۆڤایەتی جێ هیشت. 
ناوبراو لە 5/8/1941 لە شاری كرماشانی رۆژهەڵاتی كوردستان لەدایكبووەو سەر بە خێزانێكی كوردی چینی كرێكاری بووەو ژیانێكی مامناوەندیان گوزەراندووە. دوای تەواوكردنی خوێندنی ئامادەیی لەشاری كرماشان، لە دانشگای تاران بەكالۆریۆسی لە دەروونناسی و ئەدەبی فارسی وەرگرتووە. ئینجا بەناو دێهاتەكاندا بۆ چەندین ساڵ مامۆستایەتی كردووە.
بەهۆی چالاكیە سیاسیەكان و كاركردنی لەناو ریزەكانی كۆمۆنیستەكان ساڵی 1970 زیندانی كراوەو دواتر ساڵی 1976 دیسانەوە بە هەمان تۆمەت دەستگیركراوەو ئینجا بڕیاری خانەنشینكردنی دراوە، دوای ئازادكردنی كەوتۆتە ژێر چاودێری زۆری پیاوانی دەسەڵات چ لە سەردەمی حوكمڕانی شا پەهلەوی چ لەسەردەمی ویلایەتی فەقێكان. 
دەروێشیان لەدوای ساڵی 1976ـەوە خۆی بۆ خوێندنەوەو نووسین تەرخان دەكات و هەموو بەرهەمەكانی لە ئێران كە بە زمانی فارسی نووسراون بە زۆری كاریگەری كەلەپوورو ژیانی گەلی كوردیان پێوە دیارە، شاكارێكی ئەدەبی زۆری هەن یەك لەونە ئەفسانەی ئێرانییە كە لە (30) بەرگ پێكهاتووەو تایبەتە بە ئەدەبی منداڵان، یاری و گەمەی مناڵانی كورد لە دێهاتەكان دابونەریتی كورد لە رۆژهەڵاتی كوردستان، فەرهەنگی كوردی كرماشانی. هاوكات لە هەشت ساڵی جەنگی دژ بە عێراقی سەردەمی دكتاتۆر سەرنووسەری گۆڤاری هەفتانەی (جەنگ هەفتە)بووە. 
بەرهەمەكانی وەرگێردراونەتە سەر دەیان زمانی جیهانی وەك ئینگلیزی و فەرەسی و ئەڵمانی و ئەرمینی و فنلەندی. 
لە كارە ئەدەبیەكانی چوارینەی ساڵانی هەورین، كەوەك سەرگوزشتەی ژیانی نووسەرەو نووسەری بەتوانا عەزیز گەردی وەریگێڕاوەتە سەرزمانی كوردی و لە خانەی غەزەلنووس بڵاویكرداوەتەوە، رۆمانی زیندانی ژمارە 18، جگە لە چەندین بەرگەكتێبی چیرۆكنووسی وەك لەم ویلایەتەوە، ئابشوران، زبری، شەوی دووگیان، لەگەڵ گۆرانیەكانی باوكم، وەرزی نان، چیرۆكی گەرم. 
شادرەوان ساڵی 2006 خەڵاتی “هیلمن هامیت”ـی لە رێكخراوی مافی مرۆڤەوە لەسەر رۆڵی كەلتوری و سیاسی پێ بەخشراوە. 
 لە رۆژی 26ـی تشرینی یەكەمی ئەمساڵ 2017 لە نەخۆشخانەی تارانی پایتەختی ئێران عەلی ئەشرەف دەروێشیان بە یەكجاری ماڵئاوایی لە دۆستان و خۆشەویستانی خۆی و بەرهەمە ناوازەكانی كرد.

‌ 53 جار بینراوه‌
11/11/2017 10:01:38 AM
Print Friendly and PDF
بابەتی زیاتر ...
هۆشیار مەلا عەبدولڕەحمان
پارێزەر: لوقمان مستەفا ساڵح
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved