»  شۆک
لە كەركوك بۆ خوێندكارانی خورماتو و پردێ بەشەناوخۆیی بەخۆڕایی دابین دەكرێت


پاش روداوەكانی 16ی ئۆكتۆبەر و رۆژانی دواتری كە بەهۆیەوە دۆخی خورماتو و شارۆچكەی پردێ بە تەواوی تێكچوون، لە ئێستادا هەوڵ بۆ خەڵكی ئەو دەڤەرانە لە كەركوك دەدرێت بەتایبەتی لە بواری خوێندندا، لە دواین هەوڵیشدا بۆ بەردەوامی خوێندن لە زانكۆی كەركوك بەشە ناوخۆیی بۆ گەنجانی ئەو دەڤەرانە لە كەركوك تەرخانكراوە تا لەم ساڵەی خوێندن دانەبڕێن، سەبارەت بەو بابەتەش بەرپرسی رێكخراوی ئازادی لاوان لە كەركوك رایدەگەیەنێت كە ئەو كارە یەكێك بووە لە هەوڵەكانی ئەوان بۆ بەردەوامی دان بە خوێندنی گەنجانی ئەو ناوچانەی كە ئێستا ئاوارەی ناوچەكانی تر بوون.

سەعد ئەحمەد ساڵەیی خوێندكاری قۆناغی چواری بەشی یاسا لە كەركوك كە دانیشتوی شارۆچكەی پردێ بوون و لە ئێستادا ماڵیان چۆتە شاری هەولێر بۆ هەواڵ وتی: “لە دۆخێكی وا ناهەمواردا و رێكخراوی ئازادی لاوان و سەرۆكایەتی زانكۆ بیر لە هەنگاوی دابینكردنی شوێنی مانەوە بۆ خوێندكاران بكەنەوە مایەی دەست خۆشیە بەراستی”.
سەعد ئەحمەد باسی لەوەشكرد: “دۆخ چەند نا هەموار بێت، بەڵام گرنگیدان بە خوێندكار و پرۆسەی خوێندن ئەركێكی مەزنە و لەم دۆخەش دابینكردنی بەشە ناوخۆیی كۆمەڵێك گرفتی خوێندكار وەكو شوێن و رێگاوبان و خەرجی كەمدەكاتەوە كە ئەمە مایەی خۆشحاڵیە”.
ئەو خوێندكارەی زانكۆ وتیشی: “ئێمە كارەكانی رێكخراوەكانمان لەبەرچاوە و رێكخراوی ئازادی لاوان ئەمە یەكەم كاری باشیان نییە لە بواری خزمەتی گەنجدا، دڵنیام ئەم كارەش بە خۆشحاڵیە گەنجانی پردێ و خورماتوو بەرەوڕوی دەچن و بەهیوام دەستبكەنە ناوتۆمار كردن لە ئێستاوە”،
سەعد ئەحمەد وتیشی: “دابینكردنی بەشە ناوخۆیی لە زانكۆی كەركوكەوە زۆر بوار ئاسان دەكات وەك بواری ئەمنی و بواری رێگاوبان و خەرجی خوێندكار چونكە بەخۆڕاییە و ئەو بەشە ناخۆییە كۆمەڵێك خەرجی بۆ ئەو گەنجانە دەگەڕێنێتەوە و هەنگاوێكی تەواو ئەرێنییە بۆ ئێمەی خوێندكار”.
رێبین محەمەد بەرپرسی رێكخراوی ئازادی لاوانی كوردستان لقی كەركوك بۆ هەواڵ رایگەیاند: “لە پێناو بەردەوامی خوێندنی خەڵكی پردێ و خورماتو كە زۆریان لە شوێنی دووری كەركوكن ئێستا تا دانەبڕێن لە زانكۆ داواكاریەكمان بە سەرۆكایەتی زانكۆ بەرزكردەوە بە مەبەستی دابینكردنی بەشە ناوخۆیی بۆیان”،
بەرپرسی رێكخراوی ئازادی لاوان راشیگەیاند: “دوای ئەوەی وەڵامی داواكەیان لە سەرۆكایەتی زانكۆی كەركوكەوە دراوتەوە پێیان راگەیەندراوە هەر خوێندكارێك خەڵكی ناوچەكانی پردێ و خورماتو ئەو شوێنانەیە لێی دووركەوتونەتەوە و ئێستا جێگەیان دوورە بێن و داواكاری تۆماربكەن بەپێی توانا و بێ بەرامبەر بەشی ناوخۆییان بۆ دابیندەكرێت”.
دەربارەی بەشەناوخۆییەكانیش رێبین محەمەد وتی: “دڵنیای ئەوەمان پێدراوە كە شوێن بە خوێندكاران دەدرێت و بۆیە داوا لە خوێندكاران دەكەین هەرچی زووە موباشەرە بكەن و ناو تۆمار بكەن تا لە خوێندنی ئەم ساڵ بەردەوام بن”.
هەر سەبارەت بە دابینكردنی بەشەناوخۆیی بۆ خوێندكارانی خەڵكی خورماتو و پردێ، دكتۆر عومەر ئینجە یاریدەدەری سەرۆكی زانكۆی كەركوك بۆ كاروباری كارگێڕی بۆ هەواڵ وتی: “دوای ئەوەی بابەتەمان لاباسكرا و تاوتوێمان كرد دەركەوت زۆر لە خوێندكاران لە ماڵەكانیان لە خورماتوو یاخود پردێ نەماون و ئاوارەی شارەكانی هەولێر و سلێمانی بوون هەربۆیە بە پێویستمان زانی شوێنی مانەوە بۆ ئەو خوێندكارانە تەرخان بكەین”،
یاریدەدەری سەرۆكی زانكۆی كەركوك بۆ كاروباری كارگێڕی وتیشی: “پاش تاوتوێكردن و لێكۆلینەوەی بابەتەكە بڕیار درا شوێنی مانەوە لە بەشە ناوخۆیی بۆ خوێندكارانی ئەو ناوچانە تەرخان بكرێت بەمەبەستی بەردەوامیدان بە خوێندنەكەیان”.
دكتۆر عومەر ئینجە رونیشیكردەوە: “ئەگەرچی پێشتر بەشە ناوخۆیی بۆ خوێندكاری بەیانییان هەبوو و بۆ ئەوان تەرخان كرابوون، بەڵام لە ئێستادا بەهۆی ئەوەی خوێندكارانی پردێ و خورماتوو زۆربەیان لە خوێندنی ئێوارانن بۆیە بڕیارمانداوە بۆ ئێوارانیش تەرخانی بكەین و بەوانی بدەین چونكە دۆخەكە وادەخوازێت”،
هەروەها وتی: “بەشە ناوخۆییەكان هەر بەشە ناوخۆییەكانی زانكۆی كەركوكن و بە ستانداردی شارستانی دروستكراون و نزیكی خوێندنی خۆیانە و بەبێ پێدانی هیچ بڕە پارەیەك دەتوانن تێیدا بمێننەوە كە سەرجەم خزمەت گوزارییەكانی تێدا تەرخان كراوە”،
وتیشی: “هەوڵدەدەین و لەتواناماندابێت پارەی هاوكاریشیان بۆ تەرخان دەكەین و بەردەوامی باش بەپرۆسەی خوێندن دەدەین لە زانكۆكەمان”.

‌ 57 جار بینراوه‌
11/11/2017 10:05:11 AM
Print Friendly and PDF
بابەتی زیاتر ...
هۆشیار مەلا عەبدولڕەحمان
پارێزەر: لوقمان مستەفا ساڵح
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved