»  باران
هەوڵەكان بۆ رێگری لە هاوسەرگیری پێشوەختە بەردەوامن
ئا / هاوار ستار

هەوڵدەدرێت یاسای باری كەسێتی لە عێراق هەموار بكرێتەوە، ژمارەیەك چالاكوان و ژنانی سیاسییش داوای راگرتنی كاركردن بەو یاسایانە دەكەن و پێیان وایە ئەمە بە تەواوی كۆمەڵێك ماف لە ژن دەسێنێتەوەو هاوكات پێشێڵی مافەكانی مرۆڤیشە.لەماوەكانی رابردوو چەند پەرلەمانتارێك لە پەرلەمانی عێراقی هەوڵی هەمواركردنەوە و گۆڕینی چەند یاسایەكی عێراقی تایبەت دەدەن و یاسای جێگرەوەی بۆ پێشنیاز دەكەن بەناوی (یاسای گۆڕینی یاسای باری كەسێتی ژمارە 188ی ساڵی 1959)، برگەكانی ئەو یاسا پێشنیاز كراوەش ناڕەزایی بە دوای خۆیدا دێنێت چونكە وەك چالاكوانێكی بواری مافەكانی ژنان ئاماژەی بۆ دەكات شەرعیەتدانە بە حوكمی مامۆستایانی ئاینی و گەڕاندنەوەی هاوسەرگیری پێشوەختە.

دواین ئەنجامدانی هاوسەرگیری پێشوەختەش شەوی 6/11/2017 لە خێوەتگەیەكی شاری كەركوك ئەنجامدراوە كە ئاوارەكانی خوارووی كەركوكی لێ نیشتەجێن و تێیدا كچێكی 9 ساڵە لە پیاوێكی تەمەن 60 ساڵی مارەكراوە كە ئەو كچە دەبێتە سێهەمین هاوسەری.
لەو بارەیەوە، سرود محەمەد بەرپرسی لقی كەركوكی كۆمەڵەی هیوای عیراقی و چالاكوان لە بواری مافەكانی ژنان بۆ (هەواڵ) رایگەیاند: “شەرعیەت دان بەو یاسایە و پەیڕەوكردنی بەشودانی كچانی خوار هەژدە ساڵ كۆمەڵگە پەرتەوازە دەكات”.
ئەو چالاكوانەی بواری ژنان روونیشیكردەوە: “گەر هاوسەرگیری پێوشوەختە ببێتە یاسا ئەوا حاڵەتی توندوتیژی خێزانی زیاد ئەكات، بەمەش حاڵەتەكانی كوشتن و لێدان و هەڵاتن و تۆران و تەڵاق پەرەدەسێنن”.
سرود محەمەد ئاماژەی بۆ ئەوەشكرد: “حاڵەتەكانی خیانەتی هاوسەرگیری زۆردەبن و تەنانەت كاری لەشفرۆشیش بڵاوەدەكاتەوە بەهۆی ئەو زوو بەشودانەوە”.
هەروەها باسی لەوەشكرد: “برەودان بە دادگای شەرعی بەپێی مەزهەب و ئاین و پشتكردن لە یاسای نێودەوڵەتی كۆمەڵگە پەرتەوازە دەكات و كۆمەڵێك مافی مێینە دیسانەوە پێشێڵ دەكرێت كە ئەمانە كاریگەری نەرێنی زۆری دەبێت”.
سەبارەت بە دواین روداوی هاوسەرگیری پێشوەختە سرود محەمەد وتی: “لە نزیكەوە ئاگاداری ئەو رووداوەین و كچەكە و برایەكیشی بەوە رازی نەبوون، بەڵام باوكی سوڕبووە لەسەر ئەو هاوسەرگیرییە بكرێت و بەراستی ئێمە بە توندی دژی ئەو كارەین، بەڵام لەم دۆخەدا كێ گوێ دەگرێت”.
هەروەها وتی: “ئەم حكومەتە زیاتر بەرەو مەزهەبی دەچێت و مەزهەبێك وەختە لە عێراق باڵادەست دەبێت، بۆیە دەیانەوێ عورف و تەقالیدەكانی خۆیان بكەن بە یاسا كە ئەمەش لە نێو وڵاتێكی فرە نەتەوەو فرە ئاین ناكرێت جێبەجێ بكرێت”.
دەربارەی هەڵوێستی رێكخراوەیش سرود محەمەد وتی: “پێشتر ئەگەر بەردێك لە بەردەممان رێگر بووبێت ئێستا دە بەرد هەیە، بۆیە ئاسان نییە كارەكان بەباشی بكەین، چونكە كۆمەڵگەكە چەكدارەو دۆخی كەركوكیش ئێستا هەموان دەزانن لە دەستی كەركوكیەكان نییەو هێزە عێراقییەكان چاودێری دەكەن و حكومەتیش یەكگرتو نییە”.
سەبارەت بە هەمان پرس،جوان حەسەن سەرۆكی لیژنەی مافی مرۆڤ و كاروباری ژنان و مناڵان لە ئەنجومەنی پارێزگای كەركوك بۆ (هەواڵ) وتی: “ئەگەر چی كەركوك لە بارودۆخێكی تایبەتە و ئەنجومەن هێشتا كارانییە و كاروبارەكان وەكو خۆیان تێناپەڕن، بەڵام وەكو لیژنەی ژنان و خەمخۆری خۆمان بە دواداچونمان بۆ ئەو بابەتانە كردووە كە پەیوەستن بە ژنانەوە”.
سەرۆكی لیژنەی مافی مرۆڤ و كاروباری ژنان و مناڵان وتیشی: “ئەو یاسایەی هەوڵدەدرێ پەیڕەو بكرێ ئێمە كاری جدیمان لەسەری كردووە و بەردەوامین لە پەیوەندی لەگەڵ پەرلەمانتارانی لیژنەكانی ژنان و یاسایی تا چاوێك بە مافەكانی مێینە بخشێننەوە لە جیاتی زیادكردنی مافەكانیان هەوڵی كەمكردنەوەی نەدرێت”.
جوان حەسەن ئەندامی ئەنجومەنی پارێزگای كەركوك رونیكردەوە: “هەمواركردنەوەی یاسای باری كەسێتی كە كۆمەڵێك بڕگەی دژی مافەكانی ژن تێدایە یەك لەوانە هاوسەرگیری پێشوەختەیە كە بەداخەوە ئێستاش هەندێك مامۆستای ئاینی رەزامەندی لەسەر ئەو هاوسەرگیریە دەردەبڕن و كە لەبناغەدا نابێت پەیڕەو بكرێت”.
هەروەها وتی: “ئێمە وەكو لیژنەی ئەنجومەن و سەرۆكی لیژنە لەگەڵ چالاكوانان و پەرلەمانتارانی ژن و رێكخراوەكانی مافی مرۆڤ و ئەوانەی خەمی دۆزی ژنیانە لە عێراق گروپ و ژوانگەیەكمان پێكهێناوە تا فشار دروست بكەین لە پەرلەمانی عێراقدا و سەرۆكی كوتلەكان بهێنینە بڕوا كە نابێت پەیڕەوی هەمواری نوێی یاسای باری كەسێتی بچێتە بواری جێبەجێكردنەوە”.
دەربارەی چالاكیش جوان حەسەن ئاماژەی بەوەدا كە بە رێگەی رێپێوان و ئیمزا كۆكردنەوە و كۆبوونەوە هەوڵی تەواو بۆ دۆخی ژنانی عێراق دەدەن و هەوڵیش دەدەن سەرۆكی لیستەكان بهێننە بڕوا كە پێشێلی مافی مرۆڤ و ژنان نەكەن بەتایبەت لە ئێستادا كە (دەوڵەتی یاسا) وەكو بانگەشەی هەڵبژاردن هەوڵی جێبەجێكردنی ئەو پرۆژە یاسایە دەدەن”.


‌ 55 جار بینراوه‌
11/11/2017 10:05:45 AM
Print Friendly and PDF
بابەتی زیاتر ...
هۆشیار مەلا عەبدولڕەحمان
پارێزەر: لوقمان مستەفا ساڵح
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved