»  باران
كچانی زانكۆو پەیمانگاكان هاوڕێیەتی كوڕان ناكەن
ئا/ هۆشیار جەمال

بەشێك لە كچان كە دەگەنە قۆناغی خوێندی زانكۆ هاوڕێیەتی كوڕانی گروپەكەیان ناكەن یاخود بە حەزەرو ترسەوە نزیك دەبنەوەو بەشیك لە كچان دەیگێڕنەوە بۆ نەبوونی متمانە لەنێوان هەردوو رەگەزەكەو هەندێكی تر ترسی لە دەمی كەسانی چواردەور و كۆمەڵگەهەیە.

هێرۆ جەعفەر خوێندكاری قۆناغی چواری زمانی كوردییەو تەمەنی (22) ساڵە، ئەو پێیوایە “بەشیكی زۆر لەترسی كۆمەڵگەو قسەی كەسانی چواردەورە كە هەر نزیك بوونەوەیەك لەكوڕ سەرەتایەكە دروستبوونی چەندین گومانی ناڕەوا لە رووبەڕووی كچە دەبیتەوە”، دەشڵیت من كە ئیستا لە قۆناغی چوارم پەیوەندی هاوڕێیەتم لەگەڵ بە شێكی زۆری كوڕەكانی گروپەكەی خۆم نییە.
نیگار عوسمانی خوێندكاری كۆلێژی تەكنیكی دارایی و ژمێریاری وتەمەنی(23) ساڵە “پێیوایە كە هاوڕێیەتی نەكردنی كچان لەگەڵ كوڕان پەیوەندی هەیە بەوەی كە خوێندكاری كچ لە قۆناغی ناوەندی و ئامادەیی كە شەش ساڵە پێشتری لەگەڵ كوڕان دور خراونەتەوە لە یەكتری و ئێستا هەڵسوكەوتی بەرانبەرەكانیان شارەزا نین و دەترسن لە تێكەڵاوبونێك كە وەهایان لە كەسانی تر بیستووە كە هەموو رەفتاركردن لەگەڵ كەسێكی بێگانەدا توشی كێشەت دەكات یان لە شەخسیەتت كەمدەكاتەوەو هەروەها كاریگەری ئەو خانەوادانەی كە تێدا پەروەردە كراون و جۆری پەروەردەیان ئەو دوریە دروست دەكات.”
پەری فایەقی تەمەن (21) خوێندكاری كۆلێژی كارگێڕی و ئابووری دەڵێت”كچ كاتێك سەرەتا دێتە زانكۆ، بەحوكمی ئەوەی قۆناغەكانی تری خوێندن تیكەڵ نەبووە لەگەڵ رەگەزی بەرامبەر بەهۆی ئەمەوە هەندێك جار توانای مامەڵەكردنێكی دروست نابێت لەگەڵ واقعەكە، بۆیە زیاتر خۆی بەدور دەگرێت، رەنگبێت زۆربەی جار ترسەكە لەوە بێت كە لە هاوڕێیەتی كردنی كوڕەكەوە هەستی بۆ دروست بیت بەرانبەری و دواتر توشی ئازاری بكات بۆیە، خۆی بەدورئەگرێت.
هەروەها وتیشی:” كە پەروەردەیەكی دروست لە خێزاندا نەكراوە، بەبەردەوام ترسێنراوە لە رەگەزی بەرامبەر و فێری هاوڕێیەتیەكی دروست نەكراوین ‘‌.
لەو بارەیەوە رێبەر عوسمان توێژەری كومەڵایەتی دەڵێت :” لاوازی پەیوەندی نێوان كوڕان و كچانی زانكۆ دەگەڕێنمەوە بۆچەند هۆكارێك؛ ژینگەی خێزانی و ژینگەی كۆمەڵایەتی هەروەها سیستمی ئاین، سێ هۆكاری سەرەكین بۆ لاوازی ئەم پەیوەندییە لەگەڵ بوونی چەند هۆكارێكی تر، لەنێو خێزان زۆرجار بارودۆخیك دەسەپێنن كە نابێ منداڵەكانیان بەتایبەت كچ لەدەرەوەی مەحرەمی خۆیان پەیوەندی لەگەڵ هیچ كەسێكی تر دروستبكەن، بەتایبەت پەیوەندی نێوان كچ و كوڕ، ئەمە زیاتر لەنێو خێزانە داخراو و تەقلیدیەكان باوە كە قسەی باوك و برا و هەندێ جاریش دایك زاڵە بۆ دروستكردنی پەیوەندی منداڵەكانیان، ئەمە كەمتر بەدیدەكرێ لەنێو خێزانە كراوەكاندا، هەروەها ژینگەی كۆمەڵایەتی كە زیاتر لە كۆمەڵگەی ئێمە ئاین سەپاندوویەتی دەورێكی سەرەكی هەیە نەبوونی پەیوەندیەكە بەوەی كە ئاین دەڵێ، دەبێ كچان دووربن لەڕەگەزی بەرامبەر لەبەر تووشبوون بەتاوان، ئێ زۆربەی خێزانەكانی ئێمەش پەیڕەوی دەكەن، هەرچەند رێپێدراویشە ئەگەر لەچوارچێوەی شەریعەت و زانست بەیەكەوە گفتوگۆبكەن، هەروەها نەبوونی متمانەو هاتنەسەری قسەی خەلكی بەربەستن لەبەردەم پەیوەندیەكە، زۆربوونی روداوە نەخوازراوو نەویستراوەكان ی وەك كچ بەكارهێنان و دواتر خۆ لێ دوورگرتن، یان بڵاوكردنەوەی زانیاریە نهێنیەكانی كە لە پەیوەندیەكاندا دروست دەبن، ئەمانە كچانمان دووردەخەنەوە لە دروستكردنی متمانە بە رەگەزی بەرامبەر، كچان زیاتر دووردەكەونەوە لەدروستكردنی پەیوەندی، چونكە ئەگەر بێتوو ئەم شتانە روویاندا یان كەسێك بە هەڵە لە دانیشتنی پەیوەندی لەگەڵ كوڕێك تێگەیشت ئەوا قسەی خەڵكی دێتەسەرو كاردەكاتە سەر لایەنی دەروونی و كۆمەڵایەتی، باشترین چارەسەر بوونی هۆشیاریە لەنێوان هەردوولا كە چۆن پەیوەندیان دەبێ و بۆپەیوەندیان دەبێ لەچ سنووریكدا دەبێ، دەبێ هەوڵبدەن هۆشیاریان پەیوەندیەكە بە ئاراستەیەكی ویستراو دروست بكا، هەروەها واباشە ئەوە روونبكریتەوە كە بوونی پەیوەندی نێوان هەردوولا پێویستە، چونكە لەكاتی بوونی پەیوەندیەكی هاوڕێیانە یان پەیوەندیەك كەلەسەر بنەمای دروست بنیات بنرێ ئەوان دەكاتە تەواوكەری یەكتری لەبوارە فكری لایەنە مەعنەویەكانەوە.

‌ 1032 جار بینراوه‌
12/23/2017 10:11:45 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved