»  باران
رێكخراوەكانی ژنان لە كەركوك بۆ ساڵی 2017 چالاك نەبوون
ئا / هاوار ستار


ساڵی 2017 تێپەڕی وەك هەر ساڵێكی دی و بەڵام ئەوساڵە لە روی چالاكی و بڵاوكردنەوەی ئاماری قوربانییەكانی توندوتیژی دژ بەژنان كەم و كوڕی و ستتی بەدی دەكرێت و وەكو پێویست چالاكی ئەنجامنەدراوە، چالاكوانێك دەڵێت روداوەكانی 2017 زۆریان كاریگەر بوون و پرسەكانی ژنی لە شارەكە سست كردبوو لە وانە پرسی سیاسی و ئابوری و نەتەوەیی و بەرپرسی رێكخراوێكیش ئاماژە بۆ ئەوە دەكات 2017 چالاكوانانیش بوون بە قوربانیی توندوتیژی و روداوەكان.

سرود محەمەد لێپرسراوی كۆمەڵەی هیوای عێراقی لقی كەركوك بۆ هەواڵ رایگەیاند: "ساڵی 2017 ساڵێكی پر هەڵكشان و داكشان بوو لە گشت بوارەكاندا هەر بۆیە لە روی بواری ژنانیشەوە گۆڕانكاری زۆری بەخۆوە بینیوە"، هەروەها وتی: "بارودۆخەكە هێند ئاڵۆزبوو كە نەتوانراوە وەكو پێویست كار لە بوارەكانی ژناندا بكرێت و بۆ ئەمساڵ ئامارێكی روونی توندوتیژییەكان نییە بیخەینە بەردەست و رێخۆشكەریش نییە بۆ ئەو مەبەستە".
لێپرسراوی كۆمەڵەی هیوای عێراق راشیگەیاند: "دەكرێت بڵێین بەهۆی دۆخەكە قوربانی زۆربوون و تەنانەت ئێمە خۆشمان قوربانیی روداوەكانی ئەو ساڵەین و توندوتیژیمان بەرانبەركراوە"، ئەوەشی خستەڕوو: "بەهۆی ئەم بارودۆخەوە ماڵ نییە توندوتیژی تێدا نەكرێت و هەڵچونی دەرونی تێدا رونەدات و ئێمەش بەهەمانشێوە بەدەرنین لەو دۆخە و بارودۆخەكەش و ترس لە ئەنجامدانی چالاكی ئەوەش بۆ خۆی هەر لەترسی توندوتیژیە و كەموكوڕی هەبێت ئەوانە هۆكارین".
سەمیرە ئەحمەد چالاكوان لە بوارەكان ژنانیش وتی: "ساڵی 2017 ساڵێكی پڕ لە ململانێ بوو، ئێمە پێشتر وەكو رێكخراو لە راستیدا رێكخراوە كوردیەكان زیاتر چالاك بووین و بە دوای ئامار و ناڕەزایەتی و بەرەنگاربوونەوەی توندوتیژیەكاندا دەچووین، ئەگەرچی نەتەوەكانی تریشمان لەگەڵ بوون، بەڵام زیاتر لایەنە كوردیەكان گرنگیمان پێدەدا"، هەروەها وتی: "لە 2017 كێشەكان بە جۆرێك زۆربوون دەتوانم بڵێم كەیسەكانی ژنانمان وەلانا و هەندێك رێكخراو نەمان و داخران، بەگشتی بەبابەتی ترەوە سەرقاڵكراین و پاشان بابەتی سیاسی گەورەی وەكو ئاڵا هەڵكردن و شەڕی داعش و ریفراندۆم و گرتنی شار لەلایەن حەشد و سوپای عێراقیەوە زیاتر دووری خستینەوە لەبوارەكە و ئەو شوێنەی من ئیشی تێدەكەم تا ئەم دواییەش بارەگای حەشد بوو ئیتر چۆن بكەوینە كار".
سەمیرە باسی لەوەشكرد: "هۆكارێكی تر ئەوەیە ئێستا وەكو پێشو نییە و ئامار لە كێ داوا بكەین و بەرەزامەندی كێ رێت پێ دەدا و پێتدەدا، پێشتر ئێمە بۆ بابەتێك دەبوو پارێزگار ئاگاداربێت و بە ئیمزای ئەو هاوكاری دەكراین و كە ئەوەش نەما ئێستا ئاشكرایە حوكمی كەركوك بەدەست كێیە و چۆن و لەوكوێوە ئامار وەربگرین؟".
هەر لەسەر كەمتەرخەمی لەبواری ژناندا لە ساڵی 2017 سەرۆكی لیژنەی كاروباری مافەكانی ژنان و مناڵان لە ئەنجومەنی پارێزگای كەركوك ئاماژە بۆ زیادبوونی توندوتیژیەكان دەكات و جەخت لەسەر ناڕوونی ئامارەكانیش دەكاتەوە.
جوان حەسەن سەرۆكی لیژنەی كاروباری ژنان و منداڵان لە ئەنجومەنی پارێزگا بۆ هەواڵ وتی: "روداوەكانی 2017 لە شاری كەركوك كاریگەری بەرچاوی هەبووە لە هەڵچونی كەیسەكان بەرەو زیاد بوون و هەروەها كەمی بە دەمەوەچوونی ئەو كەیسانە لەلایەنە تایبەتەكانی ئەو بوارەوە"، هەروەها وتی: "بارودۆخی 2017 خەڵكی زیاتر سەرقاڵ كرد و بەڵام هەمو ئەمانە خەڵكی توندوتیژتر كردوە و روداو و كەیسەكانی ژنانی زۆر كردوە و زیاد بوونی لاشە فرێدان هەبووە و لەبەرامبەر ئەوانەشدا بەدەم نەهاتنی ئەو روداوانە هەبووە بەهۆی سەرقاڵی بەكەیسی سەربازی و ئەمنی و سیاسیەوە".
جوان حەسەن رونیشیكردەوە: "بەش بە حاڵی خۆم ساڵی 2017 بە خراپترین ساڵ دەزانم بەگشتی لە پێشێڵ كردنی مافی مرۆڤ و بە تایبەتیش لە بواری توندوتیژی دژ بە ژنان و منداڵان، لەسەر ناڕوونی ئامارەكانیش وتی: "بەداخەوە لە كەركوك زۆرجار دوو جۆر ئامارمان هەبووە كە بەهۆیەوە گلەییمان لە دەزگا ئەمنیەكان و دادگاش هەبووە كە دەبینی لە روی فەرمیەوە ئامارێكمان پێدەدەن و بەشێوازی نافەرمیش ئامارێكی تر هەیە كە ئەمە ئێمەی بەردەوام توشی كێشە كردووە لەگەڵ ئەو لایەنانە".
ئەو ئەندامەی ئەنجومەنی پارێزگا وتیشی: "زۆرجار بە تەلەفۆنێك ئامارێكمان دەستدەكەوێ رێژەیەكی بەرچاو توندوتیژی تێدا تۆمار كراوە و كە بەنوسراوی فەرمیش داوای دەكەین و پاش درەنگ وەڵامدانەوەش كە مانگێكی پێ دەچێ ئامارێكی ترمان پێدەدەن"، باسی لەوەشكرد: "بەهۆی ئەوەی بە ناڕوونی ئامارمان پێدەدەن و دوای دەخەن و دادگا وەكو پێویست نییە و پۆلیسیش دەڵێن بە نوسراو بۆمان هاتوە كە داواكاریەكان رەوانەی بەغدا دەكرێن و دواتر وەڵام دەدرێنەوە ناچار واز لەو بابەتە بێنین و وەكو پێویست كارمان لەسەر نەكردوە".



‌ 961 جار بینراوه‌
1/13/2018 9:59:51 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved