»  شەکری تاڵ
تابەدەردی ریفراندۆم نەچووەلێتان



ئەوكاتەی هاواری خەڵكی ستەم لێكراو نەچو بەگوێتاندا، هەندێك هێزی سیاسی و خەڵكی رۆشنبیری ئەم هەرێمە پڕبە گەرو پێیان وتن: ئەم هەرێمە لەوەزیاتر تێك مەدەن بەریفراندۆم، نەگوێتان گرت لە گەل و نە بەقسەی دۆستانی ئەم هەرێمەتان كرد. تائەنجامی ریفراندۆمتان شكستێكی گەورەی پڕ لەشەرمەزاری بە دۆڕانی لە 51% خاكی هەرێم كۆتاییهات، جگە لە خاك چی گومرگ و فرۆكەخانەش هەبو داتانەوە دەستی عەرەب، سەرەڕای ئەوەش نەتانتوانی ماوەیەك خۆتان بگرن هەر زوو جاڕی شكستتتاندا بەگوێی هەمو جیهان و ئاستی داواكانتان هێندە نزم بووەوە تا گەیشتە ئەوەی پارەكانتان بلۆك نەكەن و دادگاكانتان بەڕودانەكەنەوە، ئێوە هێندە پەڕاوتان هەیە ئەستەمە بتوانن لێی دەربچن. 
ئەوەی لە ریفراندۆم بەهۆی غروری و دەرچوون لە بەرگی رەسەنی خۆتانەوە نەبیستان و نەبینیتان، نە لە دۆست و نەلە دوژمن. ئەگەر ریفراندۆم پەندێك نەبێت بۆتان تابتوانن سەری رۆیشتوی خۆتان بگێڕنەوە، بەدەردی ریفراندۆم سەرتان نەنێنەوە، چیتان بردووە لەم گەلە تا زووە بیهێنەوە، بیدەنەوە خاوەنەكەی كە بەزۆر و بەڕۆژی نیوەڕۆ دەستان گرتوە بەسەریدا. كاتێك بەغروری و دەتانڕوانیە گەل حسابی هیچتان بۆ نەدەكرد. ئەمڕۆش لەداماوی و زەلیلدا بەدیار رۆژە تاریكەكانی خۆتانەوە دانیشتون. 
واباشە پێش ئەوەی لەدەرگای زیندان و دادگاوە بچنە ژورەوە، پارەكانتان سەودا و مامەڵەی نادروستی پێوە بكرێت لەودیو سنوری كوردستان، باشتر وایە پێش بلۆك كردن، ئەم پارانە بگێڕنەوە، رەنگە بەگێڕانەوەی ئەم داهاتە باری سزاتان سوك بێت. ئەم پارانەی دزیوتانە هەموو قەرزەكانی سەركورد سووك دەكات، لەقەرزی دەرەكی و قەرزی ناوخۆی فەرمانبەران و كۆمپانیاكان. نەوەك عێراق بەپارەی كورد قەرزی خۆی پێبداتەوە، ئەگینا وەك چۆن گوێتان لە ئێمە نەگرت، بەقسەی كەسمانتان نەكرد، بۆ ئەوەی ریفراندۆم دوابخەن، تاهەوڵ و مەرجی تایبەت دروست دەبێت، ئەو كارتەش مەسوتێنن و دەستی بۆ مەبەن، بەقسەی كەستان نەكرد، دەستان بۆ برد و كردتان، بەڵام كەكردیشتان رۆژی پێش 25ی ئەیلولتان، لەگەڵ رۆژی دوای 25 وەك یەك نەبوو.
ڕۆژی 24ی ئەیلول رۆژی پڕ لەسەركێشی و غروری و پەنجە راوەشاندن بوو، بەڵام رۆژی 26ی ئەیلولتان پڕبوو لە سازش، ئەم دوو رۆژە دوو دنیابینی جیاواز بوون، جیاوازبوون لەوەی ئەوەی دەیانویست نەك وەك خۆی دەرنەچوەوە، بەڵكو بەپێچەوانەوە زیاتر لەوەش لەدەستاندا كەهەتان بوو، هەردوا بەدوای ئەوە حكومەت سڕكردن و بریاری هەڵوەشاندنەوەی ریفراندۆمی راگەیاند. 
ئەوەی سەیربوو پێش 25ی ئەیلول وەڵامی جیهانتان نەدایەوە، بەڵام لە دوای ئەم بەروارە كەس وەڵامتان ناداتەوە. ئەمە چ شەرمەزاریەكە لەم هەبوونە بێیتە ئەم نەبوونە هێشتا لەدەسەڵاتدا مابێتەوە؟! ئەگەر بەدوای شكستی زیاتر و ماڵ وێران كردنی زیاتری میلەتەوە نەبن.
بەڕوونی پێتان دەڵێین تازووە ئەوەی بردووتانە بیگێڕنەوە بۆ خاوەنەكەی (گەل) قەرزەكانیان بدەنەوە، ئەگەرنا دوای بلۆك كردنی موڵك و سامانتان، دوای دەست بەسەرداگرتنی لەلایەن عەبادیەوە، وەك ریفراندۆم چاوەڕێی هێنانەوەی بكەن تاژێرخانی عێراق پێ ببوژێنێتەوە، بەو پارەیەی كە هی ژێرخانی سووتاوی كوردستانە، تا دۆلارە چاوسەوزەكانی ئەم میللەتە نەبۆتە 51% خاكەكەی و عەرەب نەیخستۆتە تەنكەی باخەڵی و ئێوەش كزو داماو بەدیاریەوە دانەنیشتون و خەڵكی كوردستانیش لەوە زەلیلتر بكەن. وەك كورد دەڵێ: ( زەرەر لەنیوەی بگەڕێتەوە هەرباشە) لەبری ئەوەی خۆتان و میللەتەكەتان زەلیلی دەستی دوژمن بن، واباشە زەلیلی دەستی گەلەكەتان بن و خۆتان رادەستی گەلەكەتان بكەن، ئەوەش بەوە دەكرێت ئەوەی لێتان دزیوە بەڕۆژی رووناك، بەڕۆژی رۆشن بیهێنەوە و داوای لێبوردن بكەن، شەرمەزاری ئەوەنیە پارەی خەڵك بهێنیتەوە، شەرمەزاری ئەوەیە پارەكەت بلۆك بكەن.
ئەوەی دەیبینم لە ئێوە ئەوەیە حەزدەكەن زەلیلی دەستی دووژمنتان بن بەلاتانەوە خۆشە لەوەی داوای لێبوردن لەگەلەكەی خۆتان بكەن، وەك چۆن لاتان ئاساییە ئۆردۆغان و عەبادی پارەی ئەم گەلە دەخوات و كوڕی ئەم گەلە دەكوژێ و شانازیشی پێوەدەكەن. 
ئەگەر بەردەوام بن لەسەر ئەم عەقڵە ئەوا پارەی دزراوی ئەم گەلەش دەكەن بە بەریفراندۆم، لەولاوە بەكزۆڵەی بۆی دەردەچن، بەڵام پێناچێت بەئاسانی رزگارتانبێت.

 ئیمزا
ئامانج هەرتەلی


‌ 1376 جار بینراوه‌
1/13/2018 10:02:55 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved