»  باران
گۆڕینی كۆمەڵگە ئەستەمە ؟!
لانه شكور


گۆڕین ئەستەم نییە، بەڵام چەمكەكانی ژیان قورسن و هەوڵی تاكی دەوێ، ئێمە رۆژانە هەمیشە رووبەڕووی كۆمەڵێك ئاستەنگ دەبینەوە كە توشی شكستمان دەكات و ئەو پرسیارە دووبارەدەكاتەوە لە مێشكمان كە گۆڕینی ئەم دۆخەو كۆمەڵگە ئەستەمەو ئیتر ئەمە دەچەسپێت، بەڵام دەبێت هەنگاوەكان هێواش بكەیتەوەو لەسەرخۆ و بە ئارامی و بەكرداری بەردەوام بیت تا وات لێدێ ئەو بیرەت لەلانامێنێ و دەگەیتە ئامانجەكەت.
لێرەدا یەكەم شت كە دەبێت خۆتی بۆ ئامادە بكەیت ئەوەیە لە خودی خۆتەوە دەستپێبكەیت و هەرگیز ئەوە بە خۆت نەڵێی نابێت، مەحاڵە، دژوارە و هتد....، تۆ گەر بتوانیت خۆت بگۆڕیت و بە ئیرادەی كردەیی بەردەوام بیت ئەوا دەستپێكی هەنگاونان بەرەو ئامانجەكەتەو دواتر شۆڕبوونەوە بۆ نێو كارەكەت كە ئامانج لێی گۆڕینی تاك و پاشان كۆمەڵگەیە، ئەوەت بیرنەچێت تۆش تاك و لەم كۆمەڵەیت چونكە گۆڕانكاری لە خودەوە دەستپێدەكات، ئەگەر خۆت بەتاڵ بیت و ئەگەر تۆ بتەوێ بە مێشكێكی بەتاڵ و بێ پلان یانیش بەپێچەوانەوە پڕ بیت بەسەری جەنجاڵ و هەڵەشەوە هەنگاو بنێیت، ئەوە رەنگە بتوانیت شتێك بكەیت، بەڵام سەركەوتونەبیت و هەر زوو شكست بێنیت.
زۆر برسیەتی جەستەیی و رۆحی خود هەرەست پێدێنێ و شكست خواردوت دەكات، بەڵام پێچەوانەكەی گەر هەوڵی بۆ بدەی تۆ واش دابنێ شكست دێنیت لەوكاتەدا هەوڵی گۆڕینی پلانەكەت بدە تا بیسەلمێنیت ئیرادەت بەردەوامەو بەهێزیت و بەڕێگەی تر خۆت لە تاقیكردنەوەی تواناكانت دەردەچێنی و سەركەوتن بەدەست دێنیت، كە ئەوەش زۆر گرنگە.
هەر یەك لە ئێمە دەتوانێت لە بچوكترین شتەوە شۆڕشێك هەڵگیرسێنێت تا هەر كەسەو بەردەوام بێت و لە شوێنی خۆیەوە هەوڵی گۆڕانكاری بدات ئەوا ئەنجام هەموان وەك تەونی جاڵجاڵۆكە دەبنە یەك و كۆمەڵگە دەتەنن و بەوەش شۆڕشی تاك دەبێتە شۆڕشی بەكۆمەڵ و لە ئەنجامیش دەتوانیت شۆڕشەكە فراوان بكەیت لە كۆمەڵەوە بۆ سەر دەسەڵات و بەِرێوبەرایەتی و سەركردایەتی و كایە سیاسی و ئابوری و كۆمەڵایەتیەكان رێكبخەیتەوە، بەمەش ئامانجی سەرەكی خۆمان دەپێكین و ئەو كات بیرمان نەچێت سەركردایەتی تەواوی كایەكان گەنج دەبێتەوەو دەتوانیت گەنجی سەركردەش دەستنیشان بكەیت بۆ پێشەوایەتی وڵات.
ئەم هەوڵانە بەچەند قۆناغێك تێپەڕدەبن و ماوەیەكی دەوێ و دەبێ دڵنیاش بین كە ئەمە هیواو خەون نییە، بەڵكو دڵنیابوونەوەیە لەوەی هەنگاو بە هەنگاو دەتوانین چی بكەین و چەند پلەی بەرز ببڕین كە بەمەش ئایندەیەكی پتەو بۆخۆمان تۆمار دەكەین و بەپتەوكردنی خۆمان و تواناو مێشكمان دواتر بەهەمان مێشك بەڕێوبەرایەتی كۆمەڵ و دەسەڵات دەكەین بەمەش لە نێو چواردەورەكەت و لەگەڵ ئەوانیش بێ ئەوەی هەست بە خۆت بكەیت دەبنە نمونەی كۆمەڵگەیەكی پتەو كە خۆی لە خۆیدا شۆڕشێكە بەسەر خودداو دواتر ئامادەكاری بۆ ئەوانی تر.
هەربۆیە وەك كەسانی چالاكی كۆمەڵگە پێش هەمو شت مەرجە كاربكەین لەسەر تاك، نمونە وەك دایك و باوك و مامۆستاو كەسایەتی ئاینی و گەنجان و كەسانی كۆمەڵایەتی و هتد... ، تا بتوانین بە تاكی تێگەیشتوو كۆمەڵێكی پێگەیشتوو بونیاد بنێین، بەمەش پرسیارەكە وەڵام دەدرێتەوە كە بەڵێ كۆمەڵگە دەگۆڕێت گەر خۆت بگۆڕی.

‌ 834 جار بینراوه‌
3/10/2018 10:43:29 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved